وزیراعظم محمد شہباز شریف نے ملائیشیاء کا سرکاری دورہ مکمل کرکے پاکستان کے لیے روانہ ہو گئے۔ وزیراعظم کو رخصت کرنے کے لیے ملائیشیاء کے وزیراعظم داتو سری انور ابراہیم خود کوالالمپور کے بنگا رایا ایئرپورٹ پر موجود تھے، جہاں غیر معمولی گرم جوشی دیکھنے میں آئی۔
قبل ازیں، وزیراعظم کی ملائیشیاء آمد پر بھی داتو سری انور ابراہیم انہیں ان کی رہائش گاہ پر خوش آمدید کہنے کے لیے موجود تھے۔
ملائیشیاء کے وزیراعظم نے شہباز شریف کو دورہ کے دوران کی گئی تصاویر پر مبنی یادگاری البم بھی پیش کی۔
وزیراعظم کو ان کی رہائش سے ائیرپورٹ تک غیر معمولی سرکاری پروٹوکول کے ساتھ رخصت کیا گیا۔
کوالالمپور کے بنگا رایا بین الاقوامی ہوائی اڈے پر پاکستان کے ہائی کمشنر سید احسن رضا اور سفارتی عملہ بھی موجود تھا۔
اپنے دورے کے دوران وزیراعظم شہباز شریف ملائیشیاء کے انتظامی مرکز پتراجایا بھی گئے، جہاں پردانا پترا میں ان کا شاندار استقبال کیا گیا۔
انہیں ملائیشیاء کی مسلح افواج کی جانب سے گارڈ آف آنر بھی پیش کیا گیا، جس کے بعد پاکستان اور ملائیشیاء کے وزرائے اعظم کے درمیان دو طرفہ ملاقات بھی ہوئی۔
دونوں وزرائے اعظم نے وفود کی سطح پر ملاقات میں اپنے اپنے وفد کی قیادت کی۔ دونوں ممالک کے درمیان کئی شعبوں میں تعاون کی مفاہمتی یادداشتوں پر بھی دستخط کئے۔
وزیراعظم پاکستان اور ملائیشیاء کے وزیراعظم نے پاکستان- ملائیشیاء بزنس اینڈ انویسٹمنٹ کانفرنس میں شرکت کی۔
وزیراعظم کو انٹرنیشنل اسلامک یونیورسٹی آف ملائیشیاء کی جانب سے لیڈر شپ اور گورننس میں پی ایچ ڈی کی اعزازی ڈگری دی گئی۔
وزیراعظم کا یہ دورہ دونوں ممالک کے درمیان تیزی سے بڑھتے ہوئے سفارتی و اقتصادی تعلقات کا عکاس ہے اور ان تعلقات کو مزید مستحکم کرنے میں مددگار ثابت ہوگا۔
