ڈی جی آئی ایس پی آر لیفٹیننٹ جنرل احمد شریف چودھری نے کہا ہے کہ معرکہ حق میں بھارت پاکستان کے کسی بھی طیارے کو گرا نہیں سکا۔ امریکی جریدے بلومبرگ کو دیے گئے انٹرویو میں لیفٹیننٹ جنرل احمد شریف چودھری نے بتایا کہ ہماری فوجی ترقیاتی حکمت عملی ہمیشہ مؤثر پلیٹ فارمز اور ملکی ٹیکنالوجی کو شامل کرنے پر مبنی رہی ہے۔
انہوں نے کہا کہ ہم ہر قسم کی ٹیکنالوجی، چاہے وہ ملکی تیار کردہ ہو یا بین الاقوامی، کے حصول کے لیے تیار رہتے ہیں، مگر پاکستان بھارت کے ساتھ ہتھیاروں کی دوڑ میں شامل نہیں ہے۔
ڈی جی آئی ایس پی آر نے واضح کیا کہ پاکستان نے کبھی بھی اعداد و شمار یا حقائق کو چھپانے یا مسخ کرنے کی کوشش نہیں کی۔ انہوں نے کہا، "بھارت معرکہ حق میں پاکستان کے کسی بھی طیارے کو نہیں گرا سکا۔"
انٹرویو کے دوران انہوں نے پاکستانی ہتھیاروں بشمول فوج میں استعمال ہونے والے چینی پلیٹ فارمز کی مؤثر کارکردگی کی تصدیق بھی کی۔
اس موقع پر بلومبرگ نے بتایا کہ ایک ہفتہ قبل امریکی صدر ڈونلڈ ٹرمپ نے 7 بھارتی طیارے مار گرائے جانے کی تصدیق کی تھی۔
معرکہ حق میں پاکستان کے چینی ساختہ J-10C نے رافیل سمیت متعدد بھارتی فضائیہ کے طیارے مار گرائے۔
بلومبرگ کے مطابق اگست میں پاکستان نے Z-10ME حملہ آور ہیلی کاپٹر کو بھی اپنے ہتھیاروں میں شامل کرنے کا اعلان کیا، پاکستان چینی ہتھیاروں کے ساتھ ساتھ امریکی ساختہ F-16 طیاروں کا استعمال بھی کرتا ہے۔
واضح رہے کہ مئی میں بھارت کے ساتھ ہونے والی جھڑپ میں پاکستان نے پہلی بار چین سے حاصل کئے گئے جدید جنگی نظاموں کو مکمل طور پر استعمال کیا۔
ان میں چینی ساختہ جے-10 سی لڑاکا طیارے شامل تھے، جنہوں نے کئی بھارتی طیارے، جن میں فرانس کے بنائے گئے رافیل طیارے بھی شامل ہیں، مار گرائے۔
