انسدادِ دہشت گردی عدالت نے 9 مئی جی ایچ کیو حملہ کیس میں بانی پی ٹی آئی عمران خان کی ٹرائل روکنے کی درخواست مسترد کرتے ہوئے کیس کی سماعت 30 ستمبر تک ملتوی کر دی۔ راولپنڈی کی انسدادِ دہشت گردی عدالت میں عمران خان کی جانب سے ٹرائل روکنے سے متعلق درخواست پر سماعت ہوئی۔
عمران خان کی قانونی ٹیم نے مؤقف اختیار کیا کہ جب تک لاہور ہائی کورٹ راولپنڈی بینچ کا ویڈیو لنک ٹرائل سے متعلق فیصلہ نہیں آتا، اس کیس کی کارروائی روک دی جائے۔
عدالت نے درخواست خارج کرتے ہوئے 8 گواہوں کو دوبارہ طلب کرنے سے متعلق دائر درخواست پر پراسیکیوشن کو نوٹس جاری کر دیا۔
عدالت کی جانب سے سماعت کے دوران استغاثہ کے 3 گواہان کے بیانات ریکارڈ کیے گئے، گواہوں میں ڈی ایس پی اکبر عباس،انسپکٹر عصمت کمال اور انسپکٹر تہذیب الحسن شامل ہیں۔
انسداد دہشت گردی عدالت نے عمران خان کی لیگل ٹیم کی جانب سے 9 مئی جی ایچ کیو حملہ کیس کا ٹرائل روکنے کی استدعا مسترد کرتے ہوئے کیس کی سماعت 30 ستمبر تک ملتوی کردی۔
