وزیراعظم شہباز شریف سعودی عرب کے دورے کے بعد برطانیہ پہنچ گئے۔ وزیراعظم سینٹرل لندن میں اپنی رہائش گاہ پر پہنچے اور لندن میں قیام کے دوران برطانوی حکام اور پاکستانی بزنس کمیونٹی سے ملاقاتیں کریں گے۔ ہفتے کو وہ اوورسیز پاکستانیز فاؤنڈیشن کی تقریب سے خطاب بھی کریں گے۔
قبل ازیں، وہ چند لمحے کے لیے سوئٹزرلینڈ کے شہر جنیوا میں رکے اور وہاں سابق وزیراعظم نواز شریف سے ملاقات کی۔
ذرائع کے مطابق شہباز شریف نے نواز شریف کو پاک سعودی عرب کے تاریخی دفاعی معاہدے کی تفصیلات سے آگاہ کیا۔
نواز شریف علاج کے سلسلے میں جنیوا میں ہیں اور آئندہ چند دنوں میں لندن آنے کا امکان ہے۔
شہباز شریف کے ساتھ وفاقی وزرا اسحاق ڈار، خواجہ آصف اور عطا تارڑ بھی لندن پہنچے ہیں۔
برطانیہ کے دورے کے بعد وزیراعظم امریکا جائیں گے، جہاں ان کی امریکی صدر ڈونلڈ ٹرمپ سے ملاقات متوقع ہے۔
اقوام متحدہ میں پاکستانی مستقل مندوب عاصم افتخار کے مطابق، دورہ امریکا میں وزیراعظم شہباز شریف مسئلہ کشمیر، فلسطین اور مشرق وسطیٰ کے دیگر معاملات خصوصاً قطر پر حملوں سے متعلق پاکستان کا موقف پیش کریں گے۔
وزیراعظم اقوام متحدہ کے جنرل اسمبلی سے خطاب کے علاوہ غزہ پر ہونےوالے اقوام متحدہ کے خصوصی اجلاس میں بھی شریک ہوں گے۔
پاکستانی مندوب نے کہا فلسطین کو بطور ریاست تسلیم کرنے سے متعلق قرارداد کو ایک تہائی کے قریب ووٹ ملے اور اس سے اسرائیل اور اس کے اتحادی ملکوں پر دباؤ بڑھا ہے ۔
