وفاقی وزارت داخلہ کے تمام ذیلی اداروں کے مابین کوآرڈینیشن بڑھانے کا فیصلہ کیا گیا ہے۔ وزیرداخلہ محسن نقوی نے سروس ڈلیوری کی بہتری اور اچھے نتائج کے لئے حصول کیلئے جامع پلان طلب کرلیا۔
وفاقی وزیر داخلہ محسن نقوی کی زیرصدارت خصوصی اجلاس ہوا جس میں تمام ذیلی اداروں سربراہان اور متعلقہ اعلی حکام نے شرکت کی۔
اس موقع پر وزیر داخلہ محسن نقوی کا کہنا تھا کہ ذیلی اداروں کے مابین کوآرڈینیشن کا فقدان ہے۔
جسے ہنگامی بنیادوں پر بہتر بنانا ہے، کارکردگی کو مزید بہتر و مؤثر بنانے کے لیے تمام ذیلی اداروں کے مابین مربوط ہم آہنگی و اشتراک کار بڑھانے کی ضرورت ہے۔
ہر ادارے کی ضروریات اور دستیاب وسائل کی تفصیلات وضع کی جائیں، ہر ادارہ دوسرے اداروں کی معاونت کے طریقہ کار کے بارے ٹھوس پلان مرتب کرے۔
تمام ذیلی اداروں میں مؤثر ربط و ہم آہنگی کے نتائج سے فائدہ عوام کو ہوگا۔
ایک دوسرے کی صلاحیتوں سے بھرپور استفادہ کر کے ہی اداروں کی استعدادکار بڑھائی جا سکتی ہے۔
