مستونگ کے قریب ریلوے ٹریک پر دھماکے کے باعث جعفر ایکسپریس کی 6 بوگیاں پٹڑی سے اتر گئیں۔ ریلوے حکام کے مطابق جعفر ایکسپریس صبح 9 بجے کوئٹہ سے پشاور روانہ ہوئی تھی کہ سپیزنڈ، مستونگ کے قریب ٹریک پر دھماکا ہو گیا، جس وقت ٹرین اس مقام سے گزر رہی تھی۔
حکام نے بتایا کہ حادثے میں کسی مسافر کے زخمی ہونے کی اطلاع نہیں ملی، تاہم بوگیوں کو شدید نقصان پہنچا۔
واضح رہے کہ چند روز قبل سبی میں بھی ریلوے ٹریک پر دھماکا ہوا تھا، مگر اس وقت جعفر ایکسپریس ایک بڑے حادثے سے محفوظ رہی تھی۔
دوسری جانب رحیم یارخان میں بھی خان پور سٹی پھاٹک پر عوام ایکسپریس کی 3 بوگیاں پٹری سے اتر گئیں۔
ریلوے حکام کا اس حوالے سے بتانا ہے کہ ٹرین پشاور سے کراچی جا رہی تھی کہ خان پور میں حادثے کا شکار ہو گئی، حادثے کا شکار بوگیوں کو ٹرین سے الگ کر دیا گیا۔
حکام کا کہنا ہے کہ حادثے کی وجہ معلوم نہیں ہو سکیں، تاہم روہڑی اور سمہ سٹہ سے امدادی ٹرین موقع پر پہنچ گئی ہے جبکہ حادثے کے باعث ڈاؤن ٹریک ٹرینوں کی آمد و رفت معطل ہے۔
