اسلام آباد میں بریسٹ کینسر ویک کی تقریب سے خطاب کرتے ہوئے وزیر صحت مصطفیٰ کمال نے اعلان کیا کہ پاکستان انسٹی ٹیوٹ آف میڈیکل سائنسز (پمز) میں بریسٹ کینسر کی مفت اسکریننگ کے لیے ملک کا پہلا جدید سہولیات سے آراستہ مرکز قائم کر دیا گیا ہے۔
وزیر صحت نے کہا کہ پمز اسپتال میں بریسٹ کینسر کی ابتدائی تشخیص کے لیے اسکریننگ سینٹر کا باضابطہ افتتاح ہو چکا ہے، جہاں خواتین کو مکمل طور پر مفت سہولت فراہم کی جائے گی۔
انہوں نے کہا کہ بریسٹ کینسر پر قابو پانے کے لیے بروقت تشخیص انتہائی اہم ہے۔ "ہم چاہتے ہیں کہ عوام بیماری کے پھیلنے سے پہلے ہی اس کی شناخت کر سکیں تاکہ علاج بروقت ممکن ہو،" وزیر صحت نے کہا۔
انہوں نے مزید کہا کہ بریسٹ کینسر کے خلاف اصل کامیابی آگاہی سے ممکن ہے۔ "ہمیں اپنی ماں، بہنوں اور بیٹیوں کو اس بیماری سے بچانے کے لیے شعور بیدار کرنا ہوگا،" ان کا کہنا تھا۔
انہوں نے طبی عملے کو مخاطب کرتے ہوئے کہا کہ ’’دکھی انسانیت کی خدمت کرنے والے اللہ کے ہاں بڑا اجر پاتے ہیں‘‘۔ وزیر صحت نے مستقبل کے منصوبوں کا اعلان کرتے ہوئے کہا کہ ضلعی سطح پر بھی اسکریننگ سینٹر ہونا چاہیے۔
مصطفیٰ کمال کا اصرار تھا کہ ’’بیمار ہونے سے پہلے خواتین اور بچیوں کو یہ ٹیسٹ کروانا چاہیے‘‘۔ اس نئی سہولت کے قیام سے ملک بھر کی خواتین کو بریسٹ کینسر کی بروقت تشخیص میں مدد ملنے کی توقع ہے۔
