ایک حالیہ تحقیق کے مطابق وہ نوجوان جو ویپ یا سگریٹ کا استعمال کرتے ہیں، ان میں ڈپریشن اور بے چینی کا خطرہ نمایاں طور پر زیادہ ہوتا ہے۔ اگرچہ ماضی میں کی جانے والی تحقیقات میں تمباکو نوشی کو ذہنی صحت کے مسائل، خاص طور پر ڈپریشن اور اضطراب، سے جوڑا جا چکا ہے، تاہم نوجوانوں میں ویپنگ اور سگریٹ نوشی کے ذہنی اثرات پر اب تک محدود سائنسی توجہ دی گئی ہے۔
نئی تحقیق اس خلا کو پُر کرنے کی کوشش ہے، جو نوجوانوں کی ذہنی صحت اور ان کی تمباکو سے وابستہ عادات کے درمیان ممکنہ تعلق کو واضح کرتی ہے۔
ویسٹ ورجینیا یونیورسٹی سے تعلق رکھنے والے تحقیق کے مصنفین نے بتایا کہ اس تعلق کا جاننا اس لیے اہم ہے کہ نوجوان اس وقت میں نشو نما کے اہم مرحلے میں ہوتے ہیں جب صحت کے لیے خطرہ رکھنے والی عادات شروع ہوتی ہیں۔
جرنل پی ایل او ایس مینٹل ہیلتھ میں شائع ہونے والی تحقیق میں محققین نے 2021 سے 2023 کے درمیان ہونے والے نیشنل یوتھ ٹوبیکو سروے سے مختلف ڈیموگرافیکس میں تمباکو کے استعمال اور ڈپریشن اور بے چینی کی علامات کے حوالے سے ڈیٹا استعمال کیا۔
سروے میں 60 ہزار 72 مڈل اسکول اور ہائی اسکول کے طلبا شریک ہوئے۔ 21.31 فی صد طلبا نے تمباکو کی مصنوعات کے استعمال، 9.94 فی صد نے برقی سیگریٹ کے استعمال کے متعلق بتایا۔
صرف 3.61 فی صد نے سیگریٹ، سگار، حقہ اور پائپ جیسی تمباکو کی روایتی مصنوعات کے استعمال جبکہ 7.80 فی صد نے ای سیگریٹ اور روایتی مصنوعات کے استعمال سے متعلق بتایا۔
مجموعی طور پر سروے میں 25.21 فی صد طلبا نے ڈپریشن جبکہ 29.55 فی صد طلبا نے بے چینی کی علامات کے متعلق بتایا۔
