پاکستان کے عالمی شہرت یافتہ گلوکار عاطف اسلم حالیہ دنوں پاکستان اور بیرون ملک کنسرٹس میں اپنی جادوئی آواز اور شاندار پرفارمنس سے مداحوں کے دل جیت رہے ہیں۔ اس وقت وہ کینیڈا میں اپنے چاہنے والوں کو محظوظ کر رہے ہیں۔
کینیڈا میں مقیم بھارتی نژاد صحافی فریدون شہریار کو دیے گئے ایک انٹرویو میں عاطف اسلم نے ان دنوں ہونے والی تنقید پر کھل کر بات کی۔
یہ تنقید اس وقت سامنے آئی جب عاطف اسلم نے والد کے انتقال کے فوراً بعد کنسرٹ میں پرفارم کیا، جس پر سوشل میڈیا پر ملے جُلے ردِعمل دیکھنے میں آئے۔
عاطف اسلم نے کہا کہ جب میرے بارے میں بے بنیاد باتیں کی جاتی ہیں تو میں خاموش نہیں رہ سکتا۔
"میرے والد کے انتقال کے بعد یہ کہا گیا کہ میں اگلے دن ہی اسٹیج پر آگیا، لیکن حقیقت یہ ہے کہ لوگ میرے دکھ کو بھی اپنی ریٹنگز اور کمائی کا ذریعہ بناتے ہیں۔"
انہوں نے مزید کہا کہ اسٹیج پر جانا یا نہ جانا میرا ذاتی فیصلہ ہے۔ "اس کے لیے مجھے کسی کی اجازت یا رائے کی ضرورت نہیں۔ یہ میرا کام نہیں کہ میں سب کو اپنی وضاحت دیتا پھروں۔"
عاطف اسلم نے واضح کیا کہ میری زندگی پوری دنیا کے لیے نہیں ہوسکتی۔ آپ مجھےمیرے فن کے لیے چاہ سکتے ہیں، میری موسیقی کے لیے برا کہہ سکتے ہیں لیکن یہ کسی کو حق نہیں پہنچتا ہے۔
اس لیے مجھ سے یہ توقع نہ رکھی جائے کہ میں ہر بار صفائی پیش کروں گا۔
