محکمہ ایکسائز اینڈ ٹیکسیشن نے اسلام آباد میں رجسٹرڈ ان تمام گاڑیوں کی رجسٹریشن 10 اکتوبر تک منسوخ کرنے کا اعلان کردیا جن کے ٹیکس ادا نہیں کئے گئے۔
محکمہ ایکسائزاینڈٹیکسیشن کے مطابق 30 جون 2025 تک جن مالکان کے ٹیکس بقایا تھے، انہیں ریڈ نوٹس جاری کئے گئے ہیں۔
ان کی رجسٹریشن پہلے ہی معطل کی جا چکی ہے اس لئے اگر مقررہ تاریخ تک واجبات ادا نہ کئے گئے تو ان کی گاڑیوں کی رجسٹریشن مستقل طور پر منسوخ کر دی جائے گی۔
محکمہ ایکسائز اینڈ ٹیکسیشن کے مطابق رجسٹریشن کی بحالی صرف واجبات اور بھاری جرمانے کی ادائیگی کے بعد ہی ممکن ہوگی۔
ٹیکس دہندگان کی سہولت کے لیے خصوصی کاؤنٹر قائم کیے گئے ہیں۔
علاوہ ازیں اسلام آباد ٹریفک پولیس نے بھی 8 اکتوبر سے ڈرائیونگ لائسنس قوانین پر سختی سے عمل درآمد کرنے کا فیصلہ کیا ہے۔
بغیر لائسنس ڈرائیوروں کو گرفتار کرکے مقدمات درج ہوں گے اور گاڑیاں قبضے میں لے لی جائیں گی، یہ حکم نامہ سرکاری اور نجی دونوں ڈرائیوروں پر یکساں طور پر لاگو ہوگا۔
انسپکٹر جنرل پولیس اسلام آبادعلی ناصر رضوی نے افسران کو ہدایت کی ہے کہ کریک ڈاؤن پر مکمل عمل درآمد یقینی بنایا جائے، بغیر لائسنس ڈرائیور اور ان کی گاڑیاں دونوں پولیس کی تحویل میں لی جائیں گی۔
