یاماہا موٹر پاکستان نے صارفین کے لیے ایک منفرد ایکسچینج آفر متعارف کرا دی ہے، جس کے تحت خریدار اپنی پرانی موٹرسائیکل منتخب ڈیلرشپس پر جمع کرا کے بالکل نئی یاماہا موٹرسائیکل حاصل کرسکتے ہیں۔
کمپنی کے مطابق اس اسکیم کا مقصد صارفین کو سہولت فراہم کرنا ہے تاکہ وہ خریدار ڈھونڈنے، قیمت پر بحث کرنے یا پرائیویٹ سیل کے جھنجھٹ سے بچ سکیں۔
اس آفر کے ذریعے بائیک مالکان کو ایک محفوظ اور آسان طریقے سے اپنی سواری کو نئی موٹرسائیکل میں اپ گریڈ کرنے کا موقع ملے گا۔
یاماہا کا کہنا ہے کہ یہ اسکیم خاص طور پر ان صارفین کے لیے ہے جو زیادہ پائیدار، اسٹائلش اور آرام دہ سواری کے خواہشمند ہیں۔ تاہم یہ آفر صرف منتخب ڈیلرشپس پر محدود مدت کے لیے دستیاب ہوگی۔
کمپنی نے مشورہ دیا ہے کہ صارفین اپنی قریبی ڈیلرشپ سے وزٹ سے پہلے اسکیم کی دستیابی کی تصدیق ضرور کرلیں۔
یاد رہے کہ اسی ہفتے یاماہا موٹر پاکستان (پرائیویٹ) لمیٹڈ نے مقامی طور پر موٹر سائیکل کی تیاری بند کرنے کا بھی اعلان کیا تھا۔
کمپنی نے اپنی نئی بزنس پالیسی کے تحت یہ فیصلہ کیا ہے اور ایک باضابطہ نوٹیفکیشن میں صارفین کا شکریہ ادا کیا ہے کہ انہوں نے برسوں تک یاماہا پر اعتماد اور وفاداری کا اظہار کیا۔
