لاہور سمیت پنجاب کے مختلف علاقوں میں صبح سویرے موسلا دھار بارش سے گرمی کی شدت میں نمایاں کمی واقع ہوئی، تاہم نشیبی علاقے زیرِ آب آ گئے، جس کے باعث شہریوں کو مشکلات کا سامنا کرنا پڑا۔
لاہور میں بارش رکنے کے بعد حبس نے شدت اختیار کر لی۔ محکمہ موسمیات کے مطابق شہر میں سب سے زیادہ 52 ملی میٹر بارش نشتر ٹاؤن میں ریکارڈ کی گئی۔
محکمہ موسمیات کے مطابق اب تک لاہور بھر میں اوسط بارش 21 ملی میٹر ریکارڈ کی گئی ہے جبکہ آج مزید بارش کے امکانات ہیں
پی ڈی ایم اے کا کہنا ہے کہ مون سون کی بارشوں کا یہ سلسلہ 10 جولائی تک جاری رہے گا۔
پنجاب کے تمام بڑے دریا، ہل ٹورنٹس اور نالے اس وقت معمول یا کم درجے کے سیلاب پر بہہ رہے ہیں۔ کسی بھی مقام پر درمیانے یا اونچے درجے کا سیلاب نہیں ہے۔
دریائے سندھ:
تربیلا: کم درجے کا سیلاب، پانی کے بہاؤ میں کمی
کالا باغ: کم درجے کا سیلاب، پانی کے بہاؤ میں کمی
چشمہ: کم درجے کا سیلاب، پانی کے بہاؤ میں اضافہ
دیگر بڑے دریا (جہلم، چناب، راوی، ستلج) اور راجن پور و ڈی جی خان کے تمام ہل ٹورنٹس معمول کے مطابق ہیں، اور کہیں بھی غیر معمولی اخراج رپورٹ نہیں ہوا۔
تمام بڑے نالے (ڈیک، ایک، پلکھو، بین، بسنتَر وغیرہ) بھی معمول کی سطح پر بہہ رہے ہیں۔
عوام کے لیے ہدایت:
رہائشی افراد کو ہدایت کی جاتی ہے کہ ہوشیار رہیں، نشیبی اور دریا کنارے علاقوں سے گریز کریں، اور پی ڈی ایم اے پنجاب و ضلعی انتظامیہ کی ہدایات پر سختی سے عمل کریں۔
ہنگامی صورت میں پی ڈی ایم اے ہیلپ لائن 1129 پر رابطہ کریں۔
پانی کی آمد اور اخراج:
ترجمان واپڈا کے مطابق تربیلا کے مقام پر دریائے سندھ میں پانی کی آمد 2 لاکھ 87 ہزار 700 کیوسک اور اخراج 2 لاکھ 82 ہزار 100 کیوسک ہے۔
منگلا کے مقام پر دریائے جہلم میں پانی کی آمد 22 ہزار کیوسک اور اخراج 8 ہزار کیوسک ہے۔
چشمہ بیراج میں پانی کی آمد3 لاکھ 64 ہزار کیوسک اور اخراج 3 لاکھ 45 ہزار 800 کیوسک ہے۔
ہیڈ مرالہ کے مقام پر دریائے چناب میں پانی کی آمد 71 ہزار 300 کیوسک اور اخراج 44 ہزار300 کیوسک ہے۔
نوشہرہ کے مقام پر دریائے کابل میں پانی کی آمد 50ہزار 400 کیوسک اور اخراج 50 ہزار400 کیوسک ہے۔
آبی ذخائر:
تربیلا ریزروائر میں آج پانی کی سطح 1521.06 فٹ اور پانی کا ذخیرہ 41 لاکھ 44 ہزار ایکڑ فٹ ہے۔
منگلا ریزروائر میں آج پانی کی سطح 1180.90 فٹ اور پانی کا ذخیرہ 31 لاکھ 45 ہزار ایکڑ فٹ ہے۔
چشمہ ریزروائر میں آج پانی کی سطح 644.20 فٹ اور پانی کا ذخیرہ 1 لاکھ 18 ہزار ایکڑ فٹ ہے۔
تربیلا، منگلا اور چشمہ ریزوائر میں قابل استعمال پانی کا مجموعی ذخیرہ 74 لاکھ 7 ہزار ایکڑ فٹ ہے۔
تربیلا اور چشمہ کے مقامات پر دریائے سندھ، نوشہرہ کے مقام پر دریائے کابل اور منگلا کے مقام پر دریائے جہلم میں پانی کی آمد اور اخراج 24گھنٹے کے اوسط بہاؤ کی صورت میں ہے جبکہ ہیڈ مرالہ سمیت دیگر مقامات پر پانی کی آمد و اخراج کی تفصیل آج صبح 6 بجے کی ہے۔
