نیشنل ڈیزاسٹر مینجمنٹ اتھارٹی ( این ڈی ایم اے ) نے اگلے 3 سے 4 دنوں کے دوران شدید بارشوں اور ممکنہ سیلاب کے حوالے سے الرٹ جاری کر دیا ہے۔
این ڈی ایم اے کے مطابق 29 جون سے 5 جولائی تک کشمیر، اسلام آباد، پوٹھوہار اور شمالی و وسطی خیبرپختونخوا میں موسلادھار بارشوں کا امکان ہے جبکہ ممکنہ بارشوں کے نتیجے میں پشاور، چارسدہ، نوشہرہ اور کوہاٹ میں شہری سیلاب کا خدشہ ہے۔
راولپنڈی، اسلام آباد، اٹک اور چکوال میں آج رات سے صبح تک شدید بارش متوقع ہے۔
جہلم، منڈی بہاؤالدین، گجرات، سیالکوٹ، گوجرانوالہ، نارووال اور لاہور میں بھی موسلادھار بارش کا امکان ہے۔
بارشوں کے باعث فیصل آباد اور سرگودھا ڈویژن کے نشیبی علاقوں میں سیلابی صورتحال پیدا ہو سکتی ہے جبکہ ہزارہ، مالاکنڈ، آزاد کشمیر اور پیرپنجال کے ندی نالوں میں طغیانی اور پہاڑی علاقوں میں لینڈسلائیڈنگ کا خدشہ ہے۔
دریائے کابل، دریائے سوات اور چترال و ہنزہ کے منسلک ندی نالوں میں پانی کے بہاؤ میں اضافہ متوقع ہے۔
2 سے 5 جولائی کے دوران کراچی، حیدرآباد، ٹھٹھہ اور بدین میں شدید بارشوں کے باعث شہری سیلاب کا خطرہ بڑھ گیا ہے۔
این ڈی ایم اے نے شہریوں کو بارش اور تیز ہواؤں کے دوران کمزور تعمیرات، کچی دیواروں، بجلی کے کھمبوں اور بل بورڈز سے دور رہنے کی ہدایت کی ہے۔
آندھی اور طوفان کے دوران حد نگاہ کم ہو سکتی ہے جو حادثات کا باعث بن سکتی ہے۔
تمام متعلقہ اداروں کو ہنگامی صورتحال سے نمٹنے کے لیے پیشگی اقدامات کی ہدایت کر دی گئی ہے۔
