سپرمون کیا ہے؟ اور پاکستان میں پہلی بار کب نظر آئے گا؟

پاکستان سمیت دنیا بھر میں 7 اکتوبر کو 2025 کے پہلے سپر مون کا نظارہ ممکن ہوگا۔

یہ سپر مون عام چاند کے مقابلے میں تقریباً 14 فیصد بڑا اور 30 فیصد زیادہ روشن نظر آئے گا۔

اس کے بعد 5 نومبر اور 5 دسمبر کو بھی سپر مون دیکھا جا سکے گا، جبکہ جنوری 2026 کے شروع میں مکمل چاند بھی سپر مون ہوگا، تاہم اسے 2025 کے سپر مون میں شمار نہیں کیا جائے گا۔

ہر سال عام طور پر 3 یا 4 سپر مون دیکھنے کو ملتے ہیں۔

7 اکتوبر کو طلوع ہونے والا یہ چاند زمین سے تقریباً 2 لاکھ 24 ہزار 599 میل کے فاصلے پر ہوگا۔

یہ ایک اہم لمحہ ہے کیونکہ یہ 11 ماہ بعد پہلا سپر مون ہوگا؛ آخری بار ایسا نومبر 2024 میں دیکھنے میں آیا تھا۔

رواں سال کا سب سے روشن چاند نومبر میں دکھائی دے گا جب وہ زمین سے 2 لاکھ 21 ہزار 817 میل کے فاصلے پر ہوگا۔

سپر مون اس لیے بھی خاص ہوتا ہے کیونکہ جب یہ افق کے قریب ہوتا ہے تو اپنے حجم سے بھی زیادہ بڑا نظر آتا ہے۔

سائنسدانوں کے خیال میں مختلف حجم والی اشیا جیسے درختوں اور عمارات کا چاند سے فاصلہ آنکھوں کو دھوکا دیتا ہے اور چاند معمول سے زیادہ بڑا نظر آتا ہے۔

اس سے قبل 7 ستمبر کو پاکستان سمیت دنیا بھر میں چاند گرہن کا نظارہ کیا گیا تھا۔