چین کو پہلی بار دنیا کے سرفہرست 10 اختراعی ممالک میں شامل کیا گیا ہے۔ اقوام متحدہ کی سالانہ گلوبل انوویشن انڈیکس میں چین جرمنی کو پیچھے چھوڑ کر 10 ویں نمبر پہنچ گیا۔ چینی کمپنیوں کی جانب سے تحقیق و ترقی پر بہت زیادہ سرمایہ کاری کی جا رہی ہے۔
اس فہرست میں سوئٹزر لینڈ بدستور پہلے نمبر پر موجود ہے جو مسلسل 2011 سے نمبرون پوزیشن پر قبضہ جمائے ہوئے ہے۔ دوسرے نمبر پر سویڈن اور تیسرے پر امریکا موجود ہے۔ اس فہرست میں 139 ممالک کی درجہ بندی 78 عوامل کو مدنظر رکھ کر کی گئی۔
سرفہرست 10 ممالک میں جو ایشیائی ملک سب سے آگے ہے وہ جنوبی کوریا ہے جو چوتھا نمبر اپنے نام کرنے میں کامیاب رہا۔ سنگاپور 5 ویں، برطانیہ چھٹے، فن لینڈ 7 ویں، نیدرلینڈز 8 ویں اور ڈنمارک 9 ویں نمبر پر رہا۔
انڈیکس کے مطابق چین بہت جلد تحقیق و ترقی پر سب سے زیادہ سرمایہ لگانے والا ملک بننے کے قریب ہے۔
2024 میں دنیا بھر میں بین الاقوامی پیٹنٹ درخواستوں میں سے 25 فیصد چین کی جانب سے جمع کرائی گئیں جبکہ امریکا، جاپان اور جرمنی کی جانب سے مجموعی طور پر 40 فیصد درخواستیں جمع کرائی گئیں جو کہ ماضی کے مقابلے میں کم تھی۔ پیٹنٹس کی ملکیت کو کسی ملک کی معاشی مضبوطی اور اقتصادی ترقی کی اہم نشانی کے طور پر دیکھا جاتا ہے۔ پاکستان اس فہرست میں 99 ویں نمبر پر ہے اور ایک سال کے دوران اس کی درجہ بندی میں کمی دیکھنے میں آئی۔
2024 میں پاکستان اس فہرست میں 91 ویں، 2023 میں 88 ویں اور 2022 میں 87 ویں نمبر پر تھا۔ نئی فہرست میں بھارت 38، بنگلادیش 106، سعودی عرب 46 اور متحدہ عرب امارات 30 ویں نمبر پر ہے۔
