ایشیا کپ کی اختتامی تقریب غیر معمولی انداز میں ختم ہوئی، جہاں فاتح بھارتی ٹیم کو ٹرافی دیے بغیر ہی انتظامیہ ٹرافی اپنے ساتھ لے گئی۔ اطلاعات کے مطابق بھارتی ٹیم لمبے وقت تک میدان میں کھڑی رہی لیکن انہیں نہ ٹرافی ملی، نہ میڈلز اور نہ ہی چیمپئن کا بورڈ دیا گیا۔ مجبوراً کھلاڑیوں نے بغیر ٹرافی اور بورڈ کے ہی تصاویر بنوائیں۔
ذرائع کا کہنا ہے کہ اب بھارتی ٹیم کو ٹرافی ملنے کا کوئی امکان نہیں رہا کیونکہ ایشیا کپ کی انتظامیہ ٹرافی اپنے ساتھ لے گئی ہے۔
اس دوران اسٹیڈیم کی لائٹس بھی بجھا دی گئیں لیکن بھارتی ٹیم اب بھی گراؤنڈ میں موجود رہی اور کھلاڑی بضد تھے کہ وہ ٹرافی لے کر ہی جائیں گے۔
واضح رہے کہ پاکستانی کھلاڑیوں سے ہاتھ ملانے سے انکار کے بعد بھارتی ٹیم اپنی ہٹ دھرمی پر قائم رہی اور صدر ایشین کرکٹ کونسل (اے سی سی) محسن نقوی سے ٹرافی وصول کرنے سے صاف انکار کردیا۔
اس رویے پر صدر اے سی سی بھی اپنے فیصلے پر ڈٹے رہے، جس کے باعث دبئی کرکٹ اسٹیڈیم میں فائنل تقریب تاخیر کا شکار ہوئی۔
بعد ازاں تقریب کے میزبان سائمن ڈول نے بتایا کہ انہیں ایشین کرکٹ کونسل کی جانب سے بتایا گیا ہے کہ بھارتی ٹیم آج ٹرافی وصول نہیں کرے گی۔
خیال رہے کہ ایشیا کپ کے دوران بھارتی ٹیم نے اسپورٹس مین اسپرٹ کی خلاف ورزی کرتے ہوئے نہ تو پاکستانی ٹیم سے ہاتھ ملایا اور نہ ہی فائنل سے قبل بھارتی کپتان نے پاکستانی کپتان کے ساتھ تصویر بنوائی۔
