ماڑی انرجیز نے سندھ کے ضلع گھوٹکی کے شہر ڈھرکی میں تیل اور گیس کے نئے ذخائر کی دریافت کا اعلان کیا ہے۔ کمپنی کی جانب سے جاری اعلامیے میں بتایا گیا کہ یہ دریافت ماڑی غزیج سی ایف بی-ون ایکسپلوریشن ویل سے ہوئی ہے۔
جو ماڑی ڈیولپمنٹ اینڈ پروڈکشن لیز کے تحت کھودا گیا تھا۔ ماڑی انرجیز اس بلاک کی 100 فیصد آپریٹر ہے۔
اعلامیے کے مطابق کنواں تیل سے بھرپور زونز کو ہدف بنا کر کھودا گیا، جہاں سے یومیہ 305 بیرل تیل اور 30 لاکھ مکعب فٹ گیس حاصل ہوئی۔
کمپنی نے مزید بتایا کہ وہ اس وقت ڈھرکی ماڑی فیلڈ میں پاکستان کے سب سے بڑے گیس ذخیرے کو چلا رہی ہے، جبکہ ماڑی انرجیز 30 فیصد سے زائد مارکیٹ شیئر کے ساتھ ملک کی سب سے بڑی گیس پیدا کرنے والی کمپنی ہے۔
