میئر کراچی مرتضیٰ وہاب نے کہا ہے کہ اگر وہ پنجاب کے معاملے میں کچھ بیان دیں تو وزیراعلیٰ مریم نواز ناراض ہو جائیں گی۔ کراچی میں میڈیا سے گفتگو کرتے ہوئے مرتضیٰ وہاب نے بتایا کہ کراچی انسٹی ٹیوٹ آف ہارٹ ڈیزیز میں دو ماہ کے اندر فری لیبارٹری شروع کی جائے گی اور اسپتال میں دو ماہ کے اندر تمام ٹیسٹ مفت کیے جائیں گے۔
انہوں نے کہا کہ کراچی کے لیے 20 ارب روپے کا فنڈ ناکافی ہے، اور وزیراعظم چاہے 200 ارب روپے بھی خرچ کریں، وہ بھی کافی نہیں ہوں گے۔
انہوں نے مزید کہا کہ کراچی کے لیے اگر کوئی کمپنی بنائی جائے تو اس پر اعتراض ہے، میں چاہتا ہوں کہ میرے شہر کو اس کے حقوق ملیں۔
مرتضیٰ وہاب نے کہا کہ پنجاب کے معاملے میں اگر کچھ بھی کہا تو مریم نواز ناراض ہو جائیں گی، حالانکہ مریم نواز نے پانی کے مسائل اور نہروں کے مسائل پر بات کی تھی۔
انہوں نے کہا کہ پنجاب کے عوام اس وقت مشکلات میں ہیں اور ہمارا فرض ہے کہ ہم ان کی تکالیف دور کریں۔
میئر کراچی نے مزید کہا کہ عوام کو الیکٹرک بس نہیں حالات میں بہتری چاہیے، پنجاب میں موٹروے بن گئی مگرکراچی میں موٹر وے نہیں بن پائی، بندرگاہ والا شہر کراچی آج بھی بنیادی سہولتوں سے محروم ہے۔
15 سال کا پی ایس ڈی پی ریکارڈ نکال لیں، سب واضح ہو جائے گا۔
