وزیراعلیٰ مریم نواز شریف کی ہدایت پر پنجاب بھر میں جنگلات کی کٹائی اور لکڑی کی نیلامی پر فوری پابندی عائد کردی گئی۔ پنجاب حکومت نے صوبے کی تاریخ میں پہلی مرتبہ جنگلات کی لکڑی کی روایتی نیلامی کا سلسلہ ختم کرنے کا بڑا فیصلہ کیا ہے۔
اب جدید ٹیکنالوجی اور میپنگ کے ذریعے نئے اور شفاف قواعد و ضوابط مرتب کیے جائیں گے۔
اس حوالے سے باضابطہ حکم نامہ بھی جاری کردیا گیا ہے۔ ماضی میں نیلامی کے نام پر جنگلات کے درختوں کی بے دریغ کٹائی کی جاتی تھی اور اس کا فائدہ چند افراد تک محدود رہتا تھا۔
حکم نامے پر عملدرآمد یقینی بنانے کے لیے محکمہ جنگلات، جنگلی حیات اور ماہی پروری کے ڈائریکٹر جنرل کو ہدایات جاری کردی گئی ہیں۔
نوٹیفکیشن کے مطابق ایندھن سمیت جنگلات کی ہر قسم کی لکڑی کی نیلامی پر تاحکم ثانی پابندی عائد کردی گئی ہے۔
وزیراعلیٰ نے یہ اقدام پنجاب کے جنگلات کے تحفظ اور زمین کو کٹاﺅ سے محفوظ بنانے کے لئے کیا ہے، مستقبل میں نیلامی سے قبل اعلیٰ معیار کی وڈیوز اور فوٹوز بھی دی جائیں گی۔
