اسلامک ریسرچ انسٹیٹیوٹ میں “ابھرتے ہوئے پاکستان میں نوجوانوں کا کردار بطور عالمی رہنما” کے موضوع پر سیمینار منعقد ہوا۔ اس موقع پر پاکستان کے 78 ویں یومِ آزادی کی مناسبت سے پرچم کشائی اور کیک کاٹنے کی پروقار تقریب بھی ہوئی۔
تقریب انٹرنیشنل اسلامی یونیورسٹی اور وزارتِ تعلیم و پیشہ ورانہ تربیت کے اشتراک سے منعقد کی گئی۔ اس کے ساتھ کتب نمائش کا بھی اہتمام کیا گیا تاکہ علم و دانش کی اہمیت اجاگر کی جا سکے۔
وزیرِ مملکت برائے تعلیم و پیشہ ورانہ تربیت وجیہہ قمر نے بطور گیسٹ آف آنر جبکہ منصوبہ بندی کے وفاقی وزیر پروفیسر احسن اقبال نے بطور چیف گیسٹ تقریب میں شرکت کی۔
سیمینار سے خطاب کرتے ہوئے پروفیسر احسن اقبال نے کہا کہ “معرکۂ حق کے بعد اب ہمیں ترقی کا معرکہ سر کرنا ہے۔” انہوں نے کہا کہ پاکستان کا مستقبل روشن ہے اور اگلے بائیس برس انتہائی اہم ہیں۔
محنت اور یکجہتی کے ساتھ ملک کو مضبوط اور ترقی یافتہ قوم کے طور پر دنیا کے سامنے لانا ہوگا۔
انہوں نے زور دیا کہ پائیدار ترقی اور خوشحالی امن کے بغیر ممکن نہیں، اور قومی یکجہتی، فرقہ واریت و پولرائزیشن کے خاتمے اور نوجوانوں کی شہری ذمہ داریوں کی ادائیگی پاکستان کے استحکام کی ضمانت ہے۔
وزیرِ مملکت وجیہہ قمر اور دیگر مقررین نے کہا کہ تعلیم قومی ترقی اور خوشحالی کی بنیاد ہے۔
انہوں نے کہا کہ نوجوان نسل نے نظریاتی سرحدوں کی حفاظت کے ساتھ ساتھ سوشل میڈیا پر افواجِ پاکستان کی حوصلہ افزائی کر کے قومی اتحاد کی مثال قائم کی۔
مقررین نے مزید کہا کہ نوجوان پاکستان کا سب سے بڑا اثاثہ ہیں، جن کے کردار اور ذمہ داریوں سے پولرائزیشن کا خاتمہ ممکن ہے اور ایک پرامن، یکجا اور عالمی سطح پر ابھرتا ہوا پاکستان تشکیل دیا جا سکتا ہے۔
تقریب میں طلبہ و طالبات کی بڑی تعداد نے شرکت کی جبکہ قومی کتاب نمائش کا افتتاح وزیرِ مملکت وجیہہ قمر نے کیا۔
