پشاور میں ایف آئی اے کا حوالہ ہنڈی کے خلاف کریک ڈاؤن

ڈی جی ایف آئی اے رفعت مختار راجہ کی ہدایت پر ایف آئی اے پشاور زون نے حوالہ ہنڈی اور کرنسی سمگلنگ کے خلاف چھاپے مارے اور مختلف علاقوں سے ملزمان کو گرفتار کیا۔ گرفتار ہونے والوں میں محمد حمزہ خان، محمد یٰسین، امداد اللہ، دانش جمیل، موصم، محمد ابرار، ذاکر علی، محمد علی اور حق نواز شامل ہیں۔

ایف آئی اے کے مطابق گرفتار ملزمان کو پشاور، نوشہرہ، مردان اور لوئر دیر کے مختلف علاقوں سے گرفتار کیا گیا ہے۔ کارروائی کے دوران ملزمان کے قبضے سے بڑی مقدار میں ملکی اور غیر ملکی کرنسیاں برآمد ہوئی ہیں۔

ملزمان کے قبضے سے کل 34 لاکھ 60 ہزار روپے نقد، 9300 سعودی ریال، 500 اماراتی درہم، 1250 قطری ریال اور 750 افغان کرنسی بھی برآمد ہوئی ہے۔

ایف آئی اے ترجمان نے بتایا کہ گرفتار افراد کے پاس حوالہ ہنڈی کی رسیدیں اور دیگر متعلقہ دستاویزات بھی برآمد ہوئی ہیں۔ ملزمان بغیر قانونی اجازت کرنسی کا کاروبار کرتے ہوئے حوالہ ہنڈی میں ملوث پائے گئے۔

ملزمان کے خلاف تفتیش جاری ہے اور مزید شواہد سامنے آنے کی توقع ہے۔