وزارتِ حج و عمرہ نے اعلان کیا ہے کہ اب مملکتِ سعودی عرب میں موجود تمام اقسام کے ویزہ ہولڈرز کو عمرہ ادا کرنے کی اجازت ہوگی۔ وزارت کے مطابق یہ فیصلہ عمرہ زائرین کے لیے سہولت میں اضافہ اور حج و عمرہ کے نظام میں خدمات کے دائرہ کار کو وسعت دینے کی کوششوں کا حصہ ہے، جو سعودی وژن 2030 کے اہداف کے عین مطابق ہے۔
وزارتِ حج و عمرہ نے واضح کیا کہ اس سہولت میں ذاتی اور خاندانی ویزے، الیکٹرانک ٹورسٹ ویزے، ٹرانزٹ ویزے، ورک ویزے اور دیگر تمام اقسام کے ویزے شامل ہیں۔
یہ اقدام مملکت کی اُن مسلسل کوششوں کی عکاسی کرتا ہے جن کا مقصد دنیا بھر سے آنے والے مسلمانوں کو زیادہ سے زیادہ سہولت فراہم کرنا ہے تاکہ وہ اپنے مذہبی فرائض اطمینان اور آسانی کے ساتھ ادا کر سکیں۔
وزارت نے مزید بتایا کہ حال ہی میں ’نسک عمرہ‘ پلیٹ فارم کا آغاز کیا گیا ہے، جو عمرہ کی ادائیگی کے خواہشمند افراد کو براہِ راست آن لائن خدمات فراہم کرتا ہے۔
اس پلیٹ فارم کے ذریعے صارفین مناسب پیکج کا انتخاب، عمرہ پرمٹ کا حصول، خدمات کی بکنگ اور وقت کے انتخاب کو بآسانی انجام دے سکتے ہیں۔
وزارت نے اس بات پر بھی زور دیا کہ یہ تمام اقدامات اور سہولیات خادمِ حرمین شریفین شاہ سلمان بن عبدالعزیز اور ولی عہد شہزادہ محمد بن سلمان کی اس خواہش کا مظہر ہیں کہ مسلمانوں کو ایک محفوظ، روحانی اور جدید سہولتوں سے آراستہ ماحول میں اپنے مناسک ادا کرنے کا موقع فراہم کیا جائے۔
وزارت کے مطابق یہ اصلاحات عمرہ زائرین کے ایمان افروز سفر کو آسان اور خوشگوار بنانے کے لیے سعودی حکومت کے تسلسل کے ساتھ کیے جانے والے اقدامات کا حصہ ہیں۔
