وزیراعظم میاں شہباز شریف کے نوٹس کے بعد عوامی ایکشن کمیٹی کے احتجاج پر پیش رفت ہوئی ہے، اور آزاد کشمیر میں تین روز کے کشیدہ حالات کے بعد ماحول نسبتاََ پرسکون ہو گیا ہے۔ ذرائع کے مطابق وفاقی وزراء اور عوامی ایکشن کمیٹی کے درمیان مذاکرات کا پہلا دور کامیابی کے ساتھ مکمل ہوا تھا، جو تقریباً دو گھنٹے جاری رہا اور اس کے بعد وقفہ ہوا۔
پہلے دور کے بعد عوامی ایکشن کمیٹی کے رہنماؤں نے دھیرکوٹ میں مشاورت جاری رکھی۔
حکومت پاکستان کے وفد کے ساتھ عوامی ایکشن کمیٹی کے مذاکرات کا دوسرا دور کل دوپہر سے شروع ہوگا۔
عوامی ایکشن کمیٹی کے رہنما شوکت نواز میر وفد کے ہمراہ دھیرکوٹ پہنچے اور کور کمیٹی کے ممبران کے ساتھ تفصیلی مشاورت کی۔ کور کمیٹی آج رات تک مذاکرات کے دوسرے دور کے لیے حکمت عملی طے کرے گی۔
شوکت نواز میر اور دیگر کے مظفرآباد پہنچنے پر دوسرا مرحلہ کل جمعہ کی نماز کے بعد ہوگا، وفاقی وزراء پر مشتمل اعلیٰ سطحی مذاکراتی کمیٹی مظفرآباد میں موجود ہے۔
