پیپلز پارٹی نے وزیراعظم آزاد کشمیر چوہدری انوار الحق کو عہدے سے استعفیٰ دینے کے لیے دوپہر 2 بجے تک کی مہلت دی ہے۔ ذرائع کے مطابق پیپلز پارٹی نے وزیراعظم کو پیغام بھیجا ہے کہ وہ مقررہ وقت تک استعفیٰ جمع کروا دیں، جبکہ پارٹی کو 36 ممبران کی حمایت حاصل ہے، دوپہر 2 بجے کے بعد تحریک عدم اعتماد فائل کر دی جائے گی۔
دوسری جانب وزیراعظم چوہدری انوار الحق نے بھی تحریک عدم اعتماد کا مقابلہ کرنے کا فیصلہ کیا ہے۔ گزشتہ روز انہوں نے بیان دیا تھا کہ اگر کسی کے پاس مطلوبہ نمبرز ہیں تو وہ تحریک عدم اعتماد لے آئیں۔
خیال رہے کہ پاکستان پیپلز پارٹی اور مسلم لیگ ن نے وزیراعظم آزاد کشمیر کے خلاف تحریک عدم اعتماد پر اتفاق کیا تھا۔
علاوہ ازیں، مسلم لیگ ن آزاد کشمیر کی پارلیمانی پارٹی اور وفاقی کمیٹی آج اجلاس کریں گی، جس میں وزیراعظم کے خلاف تحریک عدم اعتماد کے معاملے پر پیپلز پارٹی کے ساتھ مشاورت کی جائے گی اور آزاد کشمیر کی پارلیمانی پارٹی کو اعتماد میں لیا جائے گا۔
