پاکستان اور عالمی مالیاتی فنڈ (آئی ایم ایف) کے درمیان دوسرے اقتصادی جائزہ مذاکرات جاری ہیں، جس دوران آئی ایم ایف نے توانائی کے شعبے میں گردشی قرض کے اِن فلو کو جلد ختم کرنے کا مطالبہ کیا ہے۔ آئی ایم ایف نے پاکستان سے توانائی کے شعبے میں ہونے والے نقصانات اور بجلی چوری روکنے کے لیے پلان، ساتھ ہی کیپیسٹی چارجز میں کمی کی تجاویز بھی طلب کر لی ہیں۔
پاکستانی حکام نے یقین دہانی کرائی کہ گردشی قرض 6 سال کے مقررہ ہدف سے پہلے ختم کیا جائے گا، اور اس مقصد کے لیے بینکوں سے 1,225 ارب روپے کے قرض کا معاہدہ طے پا چکا ہے۔
آئی ایم ایف کو بتایا گیا کہ قرض معاہدے سے صارفین پر کوئی نیا بوجھ نہیں آئے گا، ادائیگیاں پہلے سے نافذ شدہ 3.23 روپے فی یونٹ سرچارج کے تحت کی جائیں گی۔
اضافی بجلی صنعتی شعبے اور کرپٹو مائننگ میں استعمال کی جائے گی۔
عالمی مالیاتی فنڈ نے پاکستان سے ڈسکوز کی گورننس بہتر بنانے کے لیے اصلاحات تیز کرنے کا بھی مطالبہ کردیا۔
