وزیراعظم شہباز شریف نے وائٹ ہاؤس میں امریکی صدر ڈونلڈ ٹرمپ سے اہم ملاقات کی۔ اس ملاقات میں فیلڈ مارشل سید عاصم منیر، امریکی نائب صدر جے ڈی وینس اور وزیر خارجہ مارکو روبیو بھی شریک ہوئے۔ اوول آفس میں ہونے والی یہ ملاقات ایک گھنٹہ 20 منٹ تک جاری رہی، تاہم اس دوران ہونے والی گفتگو کی تفصیلات تاحال منظرِ عام پر نہیں آئیں۔
امریکی صدر سے ملاقات کے بعد وزیراعظم شہباز شریف واشنگٹن سے نیویارک روانہ ہوگئے، جہاں وہ آج اقوامِ متحدہ کی جنرل اسمبلی سے خطاب کریں گے۔
اپنے خطاب میں وہ مسئلہ کشمیر، فلسطین، پاک بھارت کشیدگی اور مشرقِ وسطیٰ میں امن کے حوالے سے اہم نکات اجاگر کریں گے۔
ملاقات سے قبل صدر ڈونلڈ ٹرمپ نے وزیراعظم شہباز شریف اور فیلڈ مارشل عاصم منیر کو ’’عظیم رہنما‘‘ اور ’’قابلِ احترام شخصیت‘‘ قرار دیا۔
وزیراعظم شہباز شریف جب اپنے وفد کے ہمراہ واشنگٹن کے اینڈریوز ایئر بیس پہنچے تو امریکی ایئر فورس کے اعلیٰ افسر نے ریڈ کارپٹ پر ان کا استقبال کیا۔ بعد ازاں وزیراعظم کا موٹرکیڈ سخت سکیورٹی حصار میں ایئربیس سے روانہ ہوا۔
وزیراعظم شہباز شریف نے گزشتہ روز غزہ میں جنگ بندی سے متعلق صدر ٹرمپ سے مسلم رہنماؤں کی ملاقات کو مفید قرار دیاتھا، ان کا کہنا تھا کہ اب اگلا مرحلہ صدر ٹرمپ کے ساتھ ملاقات میں طے کیے گئے نکات پر عمل درآمد کا ہے۔
انہوں نے نیویارک میں صحافیوں سے گفتگو کے دوران کہاکہ معرکہ حق میں پاکستانی افواج نے ہندوستان کو شکستِ فاش دی، بھارت کا غرور خاک میں ملادیا، فیلڈ مارشل عاصم منیر نے دنیا کو دکھایا کہ کس طرح جنگیں لڑی جاتی ہیں۔
