اقوام متحدہ میں سعودی عرب اور فرانس کی میزبانی میں مسئلہ فلسطین کے دو ریاستی حل پر سربراہی کانفرنس آج منعقد ہوگی، جس میں وزیراعظم شہباز شریف بھی شریک ہوں گے۔ ترجمان دفترِ خارجہ کے مطابق وزیراعظم شہباز شریف آج سے 26 ستمبر تک اقوام متحدہ کی جنرل اسمبلی کے اجلاس میں شرکت کریں گے۔
انہوں نے بتایا کہ وزیراعظم اجلاس میں کشمیری اور فلسطینی عوام کے حقِ خود ارادیت پر زور دیں گے اور غزہ میں جاری بحران سمیت فلسطینی عوام کی مشکلات کو اجاگر کریں گے۔
وزیراعظم جنرل اسمبلی میں دہشت گردی، ماحولیاتی تبدیلی اور اسلامو فوبیا جیسے عالمی چیلنجز پر پاکستان کا مؤقف بھی پیش کریں گے۔
ترجمان کے مطابق وزیراعظم یو این اجلاس کے دوران اعلیٰ سطح کی تقریبات اور خصوصی اجلاسوں میں بھی شرکت کریں گے۔
وہ اسلامی ممالک کے رہنماؤں کے ہمراہ امریکی صدر سے بھی ملاقات کریں گے۔
ترجمان دفتر خارجہ کے مطابق شہباز شریف کی عالمی رہنماؤں اور اقوامِ متحدہ کے حکام سے دو طرفہ ملاقاتیں بھی ہوں گی۔
