بحرین کے ڈیفنس فورس چیف آف اسٹاف کی سربراہ پاک فضائیہ سے ملاقات، باہمی تعاون کو فروغ دینے کے عزم کا اعادہ

آئی ایس پی آر کے مطابق لیفٹیننٹ جنرل تھیاب صقر عبداللہ النعیمی کی آمد پر پاک فضائیہ کے ایک چاق و چوبند دستے نے انہیں گارڈ آف آنر پیش کیا۔

ائیر چیف نے معزز مہمانوں کا شاندار استقبال کرتے ہوئے اس امر پر روشنی ڈالی کہ پاکستان اور بحرین کے درمیان دیرینہ مذہبی اور تاریخی روابط استوار ہیں جو دونوں ممالک کی افواج کے مابین لازوال تعلقات کا مظہر ہیں

ملاقات کے دوران سربراہ پاک فضائیہ نے دوطرفہ عسکری تعاون، مشترکہ تربیت اور علمی استفادہ حاصل کرنے کے لیئے مختلف شعبوں میں تعاون کو مزید وسعت دینے کے عزم کا اعادہ کیا۔ ان کا مزید کہنا تھا کہ پاکستان بحرین کے ساتھ اپنے مضبوط سفارتی اور دفاعی تعلقات کو قدر کی نگاہ سے دیکھتا ہے، جو دونوں ممالک کے مابین علاقائی امن، سلامتی اور استحکام سے متعلق تمام اہم امور میں ہم آہنگی پر مبنی ہیں۔

معزز مہمان نے پاک فضائیہ کے اہلکاروں کی پیشہ وارانہ مہارت کو سراہتے ہوئے پاک فضائیہ کی جانب سے خودانحصاری اور تکنیکی ترقی کے ذریعے حاصل کردہ نمایاں پیش رفت کی تعریف کی۔

بحرین کی فضائیہ کی آپریشنل استعدادکار بڑھانے کے حوالے سے ملٹی ڈومین آپریشنز میں علمی تعاون کی اہمیت کا احاطہ کرتے ہوئے معزز مہمان نے پاک فضائیہ کے بھرپور آپریشنل تجربے سے استفادہ حاصل کرنے اور ملٹی ڈومین وارفیئر سے متعلق تربیت کے حصول کی اپنی دیرینہ خواہش کا اظہار کیا۔ دورے کے دوران سربراہان نے بحرین کے پائلٹس اور انجینئرز کے لیے جامع اور مشترکہ تربیتی پروگرامز کے آغاز میں بھی دلچسپی ظاہر کی۔

بحرین ڈیفنس فورس کے چیف آف سٹاف نے پاک فضائیہ کی جانب سے خودانحصاری کے حصول کے لیئے جاری کوششوں کو سراہتے ہوئے جدت طرازی اور جدید مقامی صلاحیتوں کی ترقی میں نیشنل ایرو اسپیس سائنس اینڈ ٹیکنالوجی پارک کے کلیدی کردار کا اعتراف کیا۔

بعد ازاں معزز مہمان نے نیشنل آئی ایس آر اینڈ انٹیگریٹڈ ایئر آپریشنز سینٹر اور پی اے ایف سائبر کمانڈ کا دورہ کیا، جہاں انہیں پاک فضائیہ کی آپریشنل صلاحیتوں کے بارے میں آگاہ کیا گیا۔

سربراہ پاک فضائیہ اور بحرین ڈیفنس فورس کے چیف آف سٹاف کے مابین ہونے والی یہ ملاقات دونوں ممالک کی جانب سے عسکری شراکت داری اور موجودہ تعلقات کو فروغ دینے کے دوطرفہ عزم کا منہ بولتا ثبوت ہے۔