وزیراعظم شہباز شریف نے مون سون بارشوں اور ملک کے مختلف حصوں میں پیدا ہونے والی سیلابی صورتحال کے پیش نظر سیاسی اتفاقِ رائے اور مشترکہ حکمت عملی کے لیے اہم سیاسی قائدین سے ٹیلیفون پر رابطہ کیا، جن میں چیئرمین پیپلز پارٹی بلاول بھٹو زرداری، ایم کیو ایم کے کنوینر خالد مقبول صدیقی اور امیر جماعت اسلامی شامل ہیں، تاکہ متاثرہ عوام کی مدد اور صورتحال سے نمٹنے کے لیے قومی سطح پر مربوط اقدامات پر تبادلہ خیال کیا جا سکے۔
شہباز شریف نے چیئرمین پاکستان پیپلز پارٹی بلاول بھٹو زرداری کو ٹیلی فون کیا اور جنوبی سندھ خصوصاً کراچی میں موسلادھار بارشوں کے باعث شہری سیلاب اور قیمتی جانوں کے ضیاع پر گہرے افسوس کا اظہار کیا۔
اس موقع پر وزیراعظم نے حکومتِ سندھ کو وفاقی حکومت کی جانب سے ہر ممکن تعاون اور معاونت کی پیشکش کی۔ انہوں نے چیئرمین این ڈی ایم اے کو ہدایت دی کہ وہ سندھ حکومت کے ساتھ مکمل رابطے میں رہیں اور صوبائی ڈیزاسٹر مینجمنٹ اتھارٹی کو ہر طرح کی معاونت فراہم کرنے کے ساتھ عوام کو ممکنہ خطرات سے پیشگی آگاہ کیا جائے۔
وزیراعظم نے امیر جماعت اسلامی حافظ نعیم الرحمن سے بھی رابطہ کیا، اور خیبرپختونخوا میں حالیہ بارشوں سے ہونے والے نقصانات اور جاری امدادی سرگرمیوں پر تبادلہ خیال کیا گیا۔ شہباز شریف نے الخدمت فاؤنڈیشن کی جانب سے بارشوں اور سیلاب کے دوران ریسکیو اور امدادی سرگرمیوں میں بڑھ چڑھ کر حصہ لینے کو سراہا۔
اسی طرح وفاقی وزیرِ تعلیم و پیشہ ورانہ تربیت ڈاکٹر خالد مقبول صدیقی سے بھی وزیراعظم نے ٹیلی فون پر گفتگو کی، جس میں سندھ میں حالیہ بارشوں اور متوقع بارشوں کے ممکنہ خطرات پر بات چیت کی گئی۔
وزیراعظم نے اس موقع پر یقین دہانی کرائی کہ وفاقی حکومت کسی بھی ہنگامی صورتحال سے نمٹنے کے لیے این ڈی ایم اے اور دیگر وفاقی اداروں کے ذریعے صوبوں کے ساتھ مکمل تعاون کرے گی۔
