نائب وزیراعظم اسحاق ڈار کی افغان وزیر خارجہ امیر خان متقی سے ملاقات ہوئی ہے، جس میں دونوں وزرائے خارجہ نے دوطرفہ تعلقات کی رفتار کو برقرار رکھنے اور علاقائی اقتصادی ترقی کی مکمل صلاحیت کے حصول کے لیے اتفاق کیا۔ ترجمان دفتر خارجہ کے مطابق دورے کے دوران وزیر خارجہ پاکستان، افغانستان، ازبکستان ریلوے لائن کی مشترکہ فزبیلٹی سٹڈی کے معاہدے پر دستخط کریں گے۔
تفصیلات کے مطابق نائب وزیراعظم اور وزیرخارجہ اسحاق ڈارنے ایک روزہ دورہ کابل میں قائم مقام افغان وزیر خارجہ ملا امیر خان متقی سے ملاقات کی جبکہ وفاقی وزیر برائے ریلوے حنیف عباسی بھی موجود تھے۔
دونوں وزرائے خارجہ نے دو طرفہ تعلقات کی رفتار کو برقرار رکھنے پر اتفاق کیا، ملاقات میں تجارت، ٹرانزٹ اور سیکیورٹی میں تعاون کو وسعت دینے کے لیے مضبوط کوششوں پر زور دیا گیا۔
ملاقات کے دوران دونوں وزرائے خارجہ نے علاقائی اقتصادی ترقی کی مکمل صلاحیت کے حصول کے لیے اتفاق کیا جبکہ بین الا علاقائی رابطوں کے منصوبوں کی تکمیل پر بھی اتفاق کیا گیا۔
اس سے قبل نائب وزیراعظم و وزیر خارجہ اسحاق ڈار افغانستان کے ایک روزہ دورے پر کابل پہنچے، افغان نائب وزیر خارجہ اور پاکستانی سفیرعبدالرحمان نظامانی نے کابل پہنچنے پر اسحاق ڈار کا استقبال کیا۔
ترجمان دفتر خارجہ کے مطابق دورے کے دوران وزیر خارجہ پاکستان، افغانستان، ازبکستان ریلوے لائن کی مشترکہ فزبیلٹی سٹڈی کے معاہدے پر دستخط کریں گے۔
دفتر خارجہ کے ترجمان کے مطابق اسحاق ڈار کے ساتھ اعلیٰ سطح کا وفد بھی موجود ہے، وزیر خارجہ کے ہمراہ نمائندہ خصوصی برائے افغانستان، وزیر ریلوے اور سیکرٹری ریلوے موجود ہے۔
