پاکستانی اداکار، ہدایتکار اور مصنف شمعون عباسی نے انکشاف کیا ہے کہ مقبول ڈرامہ ’جن کی شادی ان کی شادی‘ کا خیال، کہانی اور نام ان کی تخلیق ہے، تاہم انہیں اس کا کریڈٹ نہیں دیا گیا۔ شمعون عباسی نے اپنی فیس بک پوسٹ میں لکھا کہ یہ آئیڈیا ان کا ہے، نام انہوں نے تجویز کیا، اور اسکرپٹ کے لیے مصنف کو ہدایات بھی دی گئیں۔
ان کا کہنا تھا کہ وہ اصل میں خود اس ڈرامے کی ہدایت کاری کرنا چاہتے تھے، لیکن بعد میں ہدایت کاری کے لیے سیفِ حسن کو لیا گیا، جنہوں نے ڈرامے کو بہترین انداز میں پیش کیا۔
شمعون عباسی نے مزید کہا: "کاش تخلیق کار اتنی مہربانی کر لیتے کہ میرا نام شامل کر دیتے۔ اگر بطور ہدایتکار نہیں تو کم از کم بطور اسکرین پلے رائٹر، کیونکہ میں نے چار ماہ اس پراجیکٹ پر مصنف کے ساتھ بیٹھ کر ہر سین اور ٹریک پر کام کیا۔"
ان کے مطابق ڈرامے کی ٹیم کو دی جانے والی اسکرپٹ کی کاپیوں پر آج بھی ان کا نام درج ہے، لیکن جب ڈرامہ آن ائیر ہوا تو ان کا نام مکمل طور پر ہٹا دیا گیا۔
اس کے باوجود شمعون عباسی خوش ہیں کہ ان کا آئیڈیا عوام کو پسند آیا اور ڈرامہ کامیاب رہا۔ انہوں نے دنیا بھر کے ناظرین کا شکریہ ادا کیا اور کہا: "میں دنیا بھر کے ناظرین کا شکر گزار ہوں جنہوں نے میرے سیریل ’جن کی شادی ان کی شادی‘ کو پسند کیا۔ یہ میرا آئیڈیا اور اسکرین پلے ہے، الحمدللہ عوام میری کہانیوں سے جڑ رہے ہیں۔"
شمعون عباسی نے اپنی پوسٹ میں واضح کیا کہ یہ بیان صرف آگاہی کے لیے ہے، کسی سے لڑائی یا چیلنج کے لیے نہیں۔
لیکن اگر کسی کو لڑائی چاہیے تو یہ ذہن میں رکھیں کہ میرے پاس اپنے حق میں کئی طرح کے شواہد موجود ہیں۔‘
آخر میں انہوں نے اس تجربے کو ایک سبق قرار دیا ’کبھی بھی اپنی محنت کسی کو بغیر منصوبہ بندی کے نہ دیں۔‘
”جن کی شادی ان کی شادی“ ایک ہارر کامیڈی ڈرامہ ہے۔ اس کی کہانی سید نبیل نے لکھی ہے جبکہ ہدایتکار سیف حسن ہیں۔
کاسٹ میں وہاج علی، سحر خان، ارسلان نصیر اور رومیزہ خان سمیت کئی نامور فنکار شامل ہیں۔
ڈرامہ ہلکی پھلکی کامیڈی کے رنگ لیے ہوئے ہے اور ناظرین میں مقبولیت حاصل کر رہا ہے۔
