نئے ڈرامہ سیریل ’جن کی شادی ان کی شادی‘ کا پہلا ٹیزر جاری کر دیا گیا ہے، جس میں وہاج علی اور سحر خان مرکزی کردار ادا کر رہے ہیں۔
یہ ڈراما ہارر اور کامیڈی کا امتزاج ہے، جس میں وہاج علی ایک عام انسان کا کردار ادا کر رہے ہیں۔
جو شاعری کا شوقین ہے اور ایک پرانے طرز کے گھر میں رہتا ہے۔
جب کہ سحر خان ایک خاتون جن کے روپ میں نظر آئیں گی جو وہاج علی کی شاعری سے متاثر ہو جاتی ہیں۔
ٹیزر میں یہ اشارہ بھی دیا گیا ہے کہ سحر خان وہاج علی کی خاطر اپنے جنوں کے قبیلے سے بغاوت بھی کر سکتی ہیں۔
بظاہر ایسا لگتا ہے کہ گھر کا ایک کمرہ کسی مافوق الفطرت مخلوق کی وجہ سے بند ہوگا اور وہاج علی کے دل میں اس کمرے کو کھولنے کا تجسس ہوگا۔
ڈرامے کی ہدایت کاری سیفی حسن نے کی ہے، اسے سید نبیل نے لکھا ہے اور یہ مومنہ درید پروڈکشنز کے بینر تلے تیار کیا گیا ہے۔
اس کی کاسٹ میں وہاج علی، سحر خان، ارسلان نصیر، رومیسہ خان، سدرہ نیازی، لائبہ بٹ، سید جبران، عرفان موتی والا، نادیہ افغان، تمکنت منصور، ارباز خان، نبیل احسن اور دیگر شامل ہیں۔
فی الحال ڈرامے کے نشر ہونے کی تاریخ سامنے نہیں آئی، تاہم ہدایتکار کی ایک پوسٹ کے مطابق شوٹنگ شروع ہوئے تقریباً تین ماہ ہو چکے ہیں۔
