ترجمان پی ڈی ایم اے پنجاب کے مطابق، آج پنجاب کے کئی اضلاع میں مون سون کی بارشیں متوقع ہیں۔ مون سون کا چوتھا مرحلہ 25 جولائی تک جاری رہے گا، جو پہلے کے مقابلے میں نسبتاً زیادہ شدت کا حامل ہے۔
ترجمان کے مطابق دریاؤں کے بالائی علاقوں میں بارشوں سے پانی کے بہاؤ میں غیرمعمولی اضافے کا خدشہ ہے۔
پنجاب کے دریاؤں و ندی نالوں میں طغیانی کا الرٹ جاری کردیا گیا ہے، دریائے راوی، جہلم، ستلج اور چناب کے بہاؤ میں اضافے کا خدشہ ہے۔
ترجمان کا کہنا ہے کہ ڈی جی پی ڈی ایم اے نے ڈپٹی کمشنرز کو فیلڈ میں موجود رہنے کی ہدایات کی ہیں۔
ڈی جی کا کہنا ہے کہ دریاؤں ندی نالوں کے اطراف دفعہ 144 پر سختی سے عملدرآمد کروائیں۔
ڈی جی پی ڈی ایم اے نے پنجاب پولیس کو دریاؤں، ندی نالوں کے اطراف پیٹرولنگ بڑھانے کی ہدایت بھی کی ہے۔
