سوشل میڈیا کی مقبول ترین ایپس میں سے ایک، ٹک ٹاک نے پاکستان میں مزید 2 کروڑ 54 لاکھ سے زائد ویڈیوز حذف کر دی ہیں۔ چینی سوشل میڈیا پلیٹ فارم ٹک ٹاک، جو دنیا بھر میں مختصر ویڈیوز کی مقبول ایپ سمجھی جاتی ہے، صارفین کے لیے مخصوص کمیونٹی گائیڈ لائنز رکھتا ہے جن کی خلاف ورزی پر کارروائی کی جاتی ہے۔
ٹک ٹاک نے کمیونٹی گائیڈ لائنز کی خلاف ورزی پر عالمی سطح پر 211 ملین ویڈیوز ہٹا دیں، جن میں پاکستان سے تعلق رکھنے والی لاکھوں ویڈیوز بھی شامل ہیں۔
رواں سال کی پہلی سہ ماہی رپورٹ کے مطابق، پاکستان میں پیشگی طور پر ویڈیوز ہٹانے کی شرح 99.4 فیصد رہی، جو کہ ایک ریکارڈ سطح ہے۔
ان میں سے 95.8 فیصد ویڈیوز کو صرف 24 گھنٹوں کے اندر ڈیلیٹ کر دیا گیا۔
چینی سوشل میڈیا سائٹ نے عالمی سطح پر 211 ملین ویڈیوز ڈیلیٹ کیں۔ ان میں 31.1 فیصد بالغ یا حساس مواد، 45 فیصد غلط معلومات اور 13 فیصد مصنوعی ذہانت سے تیار کردہ ویڈیوز شامل تھیں۔
اس سے قبل مارچ 2025 میں، TikTok نے مغربی افریقہ میں خفیہ کارروائیوں سے منسلک 129 اکاؤنٹس کو بھی ہٹا دیا تھا۔
ٹک ٹاک انتظامیہ کا کہنا ہے کہ پلیٹ فارم پر تحفظ، شائستگی، پرائیویسی اور سیکیورٹی کی پالیسیوں پر سختی سے عملدرآمد کیا جا رہا ہے تاکہ صارفین کو محفوظ اور بااعتماد تجربہ فراہم کیا جا سکے۔
