پاکستان اور جنوبی افریقہ کے درمیان آخری ٹیسٹ آج سے راولپنڈی میں شروع ہوگا، تمام تیاریاں مکمل ہو گئی۔ فیصلہ کن معرکے سے قبل دونوں ٹیموں نے بھرپور پریکٹس کی۔ پاکستانی بیٹرز نے سوئپ اور ریورس سوئپ پر خصوصی پریکٹس کی تاکہ پنڈی کی پچ کے مطابق بہترین کارکردگی دکھائی جا سکے۔
ہیڈ کوچ اظہر محمود نے کہا کہ ٹیسٹ چیمپئن کے خلاف سیریز جیتنے کا یہ بہترین موقع ہے۔ لاہور کی پچ بیٹنگ اور بولنگ دونوں کے لیے اچھی رہی، اور انہوں نے بتایا کہ فائنل الیون کا اعلان ٹاس سے پہلے کیا جائے گا۔
مہمان کپتان ایڈن مارکرم نے کہا کہ ایسی کنڈیشنز میں کھیلنا ہمیشہ چیلنجنگ ہوتا ہے اور پنڈی میں بھی نعمان اور ساجد کے لیے یہ ایک بڑا امتحان ہوگا۔ انہوں نے خوشی ظاہر کی کہ کیشو مہاراج فٹ ہیں اور فائنل الیون کا حصہ ہوں گے۔
جنوبی افریقی کھلاڑیوں نے راولپنڈی میں ٹریننگ کے بعد اسلام آباد کے شاپنگ مال میں بھی سیر و تفریح کی۔
مہمان ٹیم کے کھلاڑیوں نے پاکستان کی روایتی اور ثقافتی اشیا میں خوب دلچسپی کا اظہار کیا، مختلف اشیا بھی خریدیں۔
یاد رہے کہ پاکستان اور جنوبی افریقہ کے درمیان دو ٹیسٹ میچوں کی سیریز میں میزبان ٹیم کو ایک صفر کی برتری حاصل ہے۔
