پاکستان کے سابق کپتان اور سوئنگ کے سلطان وسیم اکرم نے مشورہ دیا ہے کہ قومی ٹیم آئندہ ٹی ٹوئنٹی چیلنجز میں بابر اعظم کو مڈل آرڈر میں اینکر کی حیثیت سے کھلائے۔
ایک پروگرام میں انہوں نے اپنے خیالات کا اظہار کرتے ہوئے کہا کہ پاکستان کو بڑے ٹورنامنٹس میں جب دباؤ زیادہ ہوتا ہے ،تو اٹیکنگ مائنڈ سیٹ کے ساتھ تکنیکی طور پر مضبوط بلے باز کی ضرورت ہے۔
اس کے ساتھ انہوں نے بابر اعظم کو درپیش مشکلات کے بارے میں بھی بات کی۔ ایک سوال کا جواب دیتے ہوئے انہوں نے کہا کہ ابھی ہم بنگلہ دیش سے ہارے ہیں۔
جبکہ ویسٹ انڈیز کے خلاف سیریز 2-1 سے جیتی، لیکن مجھے لگتا ہے کہ ابھی بھی تھوڑی مستقل مزاجی کی ضرورت ہے،آگے بڑی سیریز آ رہی ہیں، ایشیا کپ آرہا ہے۔
پھر اگلے سال ورلڈ کپ ہے۔ انہوں نے کہا کہ مجھے تشویش ہے کہ تیسرے یا چوتھے نمبر پر اٹیکنگ مائنڈ سیٹ کے ساتھ کھیلنے والا بلے باز ٹیم میں نہیں ہے۔
انہوں نے کہا کہ اگر آپ کو ناک آؤٹ میچ میں 140 یا 145 کا تعاقب کرنا ہے، مثال کے طور پر آپ کو انگلینڈ، آسٹریلیا، ہندوستان یا انگلینڈ کے خلاف میچ میں ایک اینکر کی ضرورت ہے ۔
جس کا اسٹرائیک ریٹ بھی اچھا ہو، کوئی ایسا جس کی تکنیک اچھی ہو اور وہ اٹیکنگ شاٹس بھی کھیل سکتا ہو،وسیم اکرم نے کہا کہ بابر اعظم کو اگر آپ تیسرے نمبر پر کھیلاتے ہیں۔
جیسا کہ انہوں نے سمرسیٹ کے لیے 140 کے اسٹرائیک ریٹ کے ساتھ کھیلا، تو وہ اچھا پرفارم کر سکتے ہیں۔
