پنجاب میں اختلافات شدت اختیار کرگئے، زرداری نے معاملہ متعلقہ حلقوں کے سامنے رکھنے کا اعلان کردیا

اجلاس میں یہ موقف سامنے آیا کہ پیپلز پارٹی کو یا تو حکومت میں شامل ہوکر کابینہ کا حصہ بننا چاہیے یا پھر واضح اپوزیشن کا کردار ادا کرنا چاہیے، خاص طور پر پنجاب کی سطح پر۔

اجلاس میں شریک رہنماؤں نے افسوس کا اظہار کیا کہ وزیراعظم کا پنجاب کے معاملات پر کوئی مؤثر کنٹرول نظر نہیں آتا۔

پیپلز پارٹی کے رہنماؤں نے صدر زرداری کو مشورہ دیا کہ وہ متعلقہ حلقوں کو آگاہ کریں کہ کس طرح مریم نواز اتحاد میں رکاوٹیں پیدا کر رہی ہیں۔

ذرائع کے مطابق صدر زرداری نے شرکاء کی تجویز سے اتفاق کرتے ہوئے ایک ماہ کا وقت مانگا تاکہ معاملے کو بہتر انداز میں حل کیا جا سکے۔

پنجاب میں پیپلز پارٹی کے پارلیمانی لیڈر علی حیدر گیلانی کا کہنا تھا کہ صدر زرداری، مسلم لیگ (ن) کے قائد نواز شریف سے ملاقات میں یہ معاملہ اٹھا سکتے ہیں۔

انہوں نے کہا کہ صدر زرداری نے شرکاء کو دو محاذوں پر جنگ کی صورتحال سے آگاہ کیا جس کا ملک کا سامنا ہے، مشرقی اور مغربی دونوں سرحدوں پر بڑھتے چینلجز کے پیش نظر اپنی توانائیاں قومی اتحاد پر مرکوز کرنے پر زور دیا۔

صدر زرداری نے پنجاب میں پارٹی ارکان کے اپوزیشن بنچوں پر بیٹھے کی درخواست پر کہا کہ پارٹی نے یکساں پالیسی اختیار کرنے کا اصولی فیصلہ کر رکھا ہے۔