وزیراعظم کی زیر صدارت گلگت بلتستان سے متعلق اعلیٰ سطحی اجلاس اکتوبر میں ہو گا

 وزیراعظم راجہ پرویز اشرف کی زیر صدارت گلگت بلتستان سے متعلق ایک اعلیٰ سطحی اجلاس اکتوبر میں ہو گا جس میں علاقہ میں امن و امان کی صورتحال اور مالیاتی امور کا جائزہ لے کر اس خطہ میں امن و استحکام اور خوشحالی لانے کے حوالہ سے اہم فیصلے کئے جائیں گے۔ اجلاس میں قانون کے نفاذ کو مزید بہتر بنانے پر توجہ مرکوز کی جائے گی تاکہ گلگت بلتستان کے مکین اس خطہ میں سیاحت کے مواقع سے بھرپور استفادہ کر سکیں۔ یہ اجلاس وزیراعظم راجہ پرویز اشرف کے حالیہ دو روزہ دورہ گلگت بلتستان کا تسلسل ہو گا جس میں گذشتہ فیصلوں پر عملدرآمد کا جائزہ لینے کے ساتھ ساتھ مالیاتی امور سمیت دیگر زیر التواء معاملات بھی زیر غور آئیں گے۔ واضح رہے کہ وزیراعظم نے اپنے دورہ کے دوران گلگت بلتستان کے سیاسی و مذہبی رہنمائوں اور عمائدین کے ساتھ ملاقاتوں میں 2 ارب روپے کی مالی معاونت کا اعلان کرتے ہوئے یقین دہانی کرائی تھی کہ اس علاقہ کی ضروریات کو پورا کرنے کیلئے وفاقی حکومت مزید وسائل فراہم کرے گی کیونکہ پاکستان کی ترقی میں اس علاقہ کا کردار اہم ہے