اسلام آباد سے گلگت جانے والے پی آئی اے کے طیارے پی کے چھ سو پانچ میں ٹیک آف کے دوران ٹائر میں آگ لگ گئی۔ طیارے میں گورنر گلگت بلتستان پیر مکرم علی شاہ سمیت اڑتالیس مسافر سوار تھے جومحفوظ رہے۔
ایئر پورٹ ذرائع کے مطابق یہ واقعہ آج صبح ساڑھے سات بجے پیش آیا۔ طیارہ رن وے پر ٹیک آف کرنے ہی والا تھا کہ اس کے ٹائر میں آگ لگ گئی۔ پائلٹ نے طیارے کو بحفاظت روک لیا اور مسافروں کو اتار لیا گیا۔ایئر پورٹ ذرائع کے مطابق طیارے کا ٹائر بدل دیا گیا مگر پرواز آج منسوخ کر دی گئی۔ مسافروں کو کل گلگت بلتستان روانہ کیا جائے گا۔
