ترکیہ کے شہر استنبول میں پاکستان اور افغانستان کے درمیان مذاکرات کا دوسرا دور مکمل ہوگیا۔ ذرائع کے مطابق مذاکرات استنبول کے ایک مقامی ہوٹل میں ہوئے، جن کی میزبانی ترکیہ کے اعلیٰ حکام نے کی۔ اس موقع پر دونوں ممالک کے وفود نے دوحہ میں ہونے والے پہلے دورِ مذاکرات میں طے پانے والے نکات پر عمل درآمد کا تفصیلی جائزہ لیا۔
ذرائع کا کہنا ہے کہ پاکستان نے افغان طالبان کو دہشت گردی کی روک تھام کے لیے ایک جامع اور قابلِ عمل پلان پیش کیا۔
مذاکرات میں پاکستان کی جانب سے دو رکنی وفد نے شرکت کی، جبکہ افغان وفد کی قیادت نائب وزیرِ داخلہ رحمت اللہ مجیب نے کی۔
واضح رہے کہ پاکستان اور افغانستان کے درمیان مذاکرات کا پہلا دور قطر اور ترکیہ کی مشترکہ ثالثی میں دوحہ میں ہوا تھا، جس کے نتیجے میں دونوں ممالک کے درمیان جنگ بندی پر اتفاق کیا گیا تھا۔
پاک افغان کشیدگی کے باعث چمن، خیبر، جنوبی و شمالی وزیرستان اور ضلع کرم کی سرحدی راستے 14 ویں روز بھی بند ہیں۔
باب دوستی طورخم، خرلاچی، انگور اڈہ اور غلام خان سرحد پر سیکڑوں مال بردار گاڑیاں پھنسی ہوئی ہیں۔
