قطری وزارت خارجہ نے اعلان کیا ہے کہ پاکستان اور افغانستان نے فوری جنگ بندی پر اتفاق کر لیا ہے۔ قطری وزارت خارجہ کے جاری کردہ بیان میں بتایا گیا ہے کہ یہ فیصلہ دوحہ میں ہونے والے مذاکرات کے دوران طے پایا۔بیان میں کہا گیا ہے کہ پاکستان اور افغانستان کے درمیان جنگ بندی پر اتفاق قطر اور ترکی کی ثالثی میں ہوا۔
دونوں ممالک نے آئندہ چند دنوں میں مزید ملاقاتیں کرنے اور امن و استحکام کے لیے مستقل مکینزم قائم کرنے پر بھی اتفاق کیا ہے۔
قطری وزارت خارجہ کے مطابق یہ جنگ بندی خطے میں پائیدار امن کے قیام کی مضبوط بنیاد فراہم کرے گی اور امید ہے کہ اس سے سرحدی کشیدگی میں کمی آئے گی۔
یاد رہے کہ گزشتہ روز قطری انٹیلی جنس چیف عبداللہ بن محمد الخلیفہ کی میزبانی میں مذاکرات کا پہلا دور دوحہ میں مکمل ہوا، جس میں پاکستانی وفد کی قیادت وزیر دفاع خواجہ آصف نے کی اور سکیورٹی حکام نے وزیر دفاع کی معاونت کی۔
دوسری جانب افغان وفد کی سربراہی وزیر دفاع ملا محمد یعقوب نے کی۔
یاد رہے کہ جمعہ کو پاکستان اور افغان طالبان رجیم کے مابین فائر بندی میں مزید توسیع پر اتفاق ہوا تھا۔
