فیلڈ مارشل اور آرمی چیف سید عاصم منیر نے کہا ہے کہ پاکستان نے معرکہ حق میں اپنی عسکری اور دفاعی صلاحیتوں کا لوہا منوایا ہے، اور بھارتی فوجی قیادت کو خبردار کرتے ہیں کہ نیوکلیئر ماحول میں دونوں ممالک کے درمیان جنگ کی کوئی گنجائش نہیں ہے۔ پی ایم اے کاکول کی پاسنگ آؤٹ پریڈ سے خطاب میں انہوں نے کہا کہ آپریشن بنیان مرصوص کے دوران قوم نے اپنی فوج کے ساتھ فولاد کی مانند کھڑے ہو کر دشمن کا مقابلہ کیا، اور اس آپریشن نے قوم کے فوج پر اعتماد مزید مضبوط کیا۔
فیلڈ مارشل عاصم منیر نے بھارت کی جانب سے پاکستان پر لگائے گئے بے بنیاد الزامات کی مذمت کی اور کہا کہ پاکستانی افواج نے اپنی قوم کی حمایت سے سرحدوں کا کامیابی سے دفاع کیا۔
انہوں نے بتایا کہ پاکستان نے رافیل طیاروں کو مار گرایا اور دشمن کی متعدد بیسز بشمول ایس 400 سسٹمز کو نشانہ بنایا۔
آرمی چیف نے کہا کہ پاکستان نے ملٹی ڈومین وارفیئر کی صلاحیتوں کا بھرپور مظاہرہ کیا اور اللہ کے فضل و قومی عزم کے ساتھ دشمن کا مقابلہ فولادی دیوار کی مانند کیا۔
بھارت کی جانب سے خود ساختہ شواہد پیش کرنا اس بات کا ثبوت ہے کہ وہ دہشت گردی کو سیاسی رنگ دینے کے لیے کوشاں ہیں۔
انہوں نے مزید کہا کہ دشمن کے خلاف واضح فتح نے عالمی برادری کا وقار بڑھایا اور نوجوانوں میں یہ اعتماد مضبوط کیا کہ پاکستان کی مسلح افواج قومی طاقت کا بنیادی ستون ہیں۔
آرمی چیف نے قوم کو یقین دلایا کہ اللہ کے فضل سے پاکستان کی مقدس سرزمین کا ایک انچ بھی دشمن کے حوالے نہیں ہونے دیا جائے گا۔ انہوں نے ہر سپاہی، سیلر، فضائیہ کے جوان، مرد، خواتین اور شہداء کو خراج تحسین پیش کیا، جنہوں نے وطن کے دفاع میں قربانیاں دی ہیں۔
انہوں نے خبردار کیا کہ دشمن پاکستانی افواج اور عوام کے درمیان دراڑ ڈالنے کی کوشش کر رہا ہے، لیکن شہداء کی قربانیوں کی بدولت آج پاکستان آزادی کی زندگی گزار رہا ہے اور افواج پاکستان دنیا کی بہترین فوج ہیں۔
انہوں نے کہا کہ پاکستان کا دفاعی نظریہ کریڈیبل ڈیٹرنس اور دائمی تیاری پر مبنی ہے، جس میں تمام صلاحیتوں کا احاطہ کیا گیا ہے۔
یہ پیشہ ور فوج روایتی میدان میں بھی دشمن کو منہ توڑ جواب دے کر اپنی صلاحیتیوں کا لوہا منوا چکی ہیں، دوبارہ جارحیت کی کوشش کی گئی تو پاکستان دشمن کی توقعات سےکہیں زیادہ سخت جواب دے گا۔
جنگ میں ہمارے ہتھیار زیادہ نقصان دہ ثابت ہوتے ہوئے بھارت کی جغرافیائی وسعت کا من گھڑت حفاظتی تصور ختم کر دیں گے۔
سید عاصم منیر کا کہنا تھا دشمن کو پہنچائے جانے والےفوجی و اقتصادی نقصانات بھارت کی توقعات سےکہیں زیادہ بڑھ کر ہوں گے۔
بھارتی فوجی قیادت کو خبردار کرتا ہوں نیوکلیئر انوائرمنٹ میں دونوں ممالک میں جنگ کے لیے گنجائش نہیں، پاکستان کے ساتھ بنیادی مسائل کوبین الاقوامی اصولوں کے مطابق برابری اور باہمی احترام کی بنیاد پر حل کریں۔
آرمی چیف نے بہترین کاکردگی کا مظاہرہ کرنے والے کیڈٹس کو اعزازت سے بھی نوازا
قبل ازیں پی ایم اے کاکول میں 152 ویں لانگ کورس، 37 ویں ٹیکنیکل گریجویٹ کورس، 71 ویں اینٹی گریٹٹ کورس اور 26 ویں لیڈی کیڈٹ کورس کی پاسنگ آؤٹ پریڈ کی شاندار تقریب کا انعقاد کیا گیا۔
پاس آؤٹ والوں میں 40 دوست ممالک کے فوجی بھی شامل تھے جن کا تعلق عراق، مالدیپ، مالی، نیپال، فلسطین، سری لنکا، یمن، نائیجیریا، قطر اور بنگلا دیش سے ہے۔
فیلڈ مارشل عاصم منیر کی آمد پر حاضرین نے کھڑے ہو کر ان کا شاندار استقبال کیا۔
بعدازاں مہمان خصوصی فیلڈ مارشل عاصم منیر نے پریڈ کا معائنہ بھی کیا اور بہترین کارکردگی دکھانے والے کیڈٹس کو اعزازی شمشیر اور شیلڈ سے نوازا۔
