وفاقی حکومت نے سرکاری ملازمین کے لیے بڑا مالیاتی ریلیف دیتے ہوئے ہاؤس رینٹ الاؤنس میں 85 فیصد اضافے کا اعلان کر دیا۔
میڈیا رپورٹس کے مطابق وفاقی حکومت نے گریڈ 1 سے 22 تک کے تمام سرکاری ملازمین چاہے وہ مستقل ہوں یا کنٹریکٹ پر کے ہاؤسنگ رینٹ الاؤنس میں 85 فیصد اضافہ کرنے کا فیصلہ کیا ہے۔
ذرائع کے مطابق وزارتِ خزانہ نے اس تجویز کی منظوری دے دی ہے، جسے حتمی منظوری کے لیے جلد وفاقی کابینہ کے اجلاس میں پیش کیا جائے گا۔
نئے الاؤنس کا تعین اب ملازمین کی موجودہ بنیادی تنخواہ کے مطابق کیا جائے گا، جب کہ پہلے یہ 2008 کے پے اسکیل کی بنیاد پر دیا جاتا تھا۔
ذرائع کا کہنا ہے کہ کابینہ سے منظوری کے بعد یہ فیصلہ مہنگائی اور بڑھتے ہوئے کرایوں سے متاثر سرکاری ملازمین کے لیے اہم ریلیف ثابت ہوگا۔
یہ پالیسی گزشتہ کئی برسوں میں ہاؤس رینٹ الاؤنس میں ہونے والا سب سے بڑا اضافہ قرار دی جا رہی ہے، جس کا مقصد سرکاری ملازمین کے مالی دباؤ میں کمی لانا ہے۔
