صدر مملکت آصف علی زرداری سندھ اور پنجاب حکومت کے درمیان بڑھتی کشیدگی کو ختم کروانے کے لیے متحرک ہو گئے اور معاملے کے حل کے لیے وزیر داخلہ محسن نقوی کو فوری طور پر طلب کر لیا۔ ذرائع ایوان صدر کے مطابق صدر زرداری نے وزیر داخلہ کو ٹیلی فون کے ذریعے سندھ اور پنجاب کے درمیان جاری کشیدگی پر تبادلہ خیال کیا۔
ذرائع کا کہنا ہے کہ صدر نے وزیر داخلہ محسن نقوی کو فوری طور پر کراچی طلب کیا تاکہ دونوں صوبائی حکومتوں کے درمیان حالات کو معمول پر لایا جا سکے۔
واضح رہے کہ گزشتہ چند روز سے پنجاب اور سندھ حکومت کے درمیان لفظی گولہ باری جاری ہے۔
وزیر اعلیٰ پنجاب مریم نواز کے بیان پر پیپلز پارٹی نے شدید تحفظات کا اظہار کرتے ہوئے قومی اسمبلی سے واک آؤٹ کیا اور معافی کا مطالبہ کیا۔
تاہم وزیر اعلیٰ پنجاب نے کہا کہ اگر کوئی پنجاب کے خلاف بات کرے گا تو وہ بطور وزیر اعلیٰ جواب دیں گی اور صوبے کے عوام کا تحفظ کریں گی، کسی سے معافی نہیں مانگیں گی۔
دوسری جانب وزیر اطلاعات سندھ شرجیل میمن نے وزیر اطلاعات پنجاب عظمیٰ بخاری کو مباحثے کا چیلنج دیا جسے عظمیٰ بخاری نے قبول کرتے ہوئے کہا کہ آپ سندھ میں اپنی 17 سالہ حکومت کے دوران 17 منصوبے گنوا دیں۔
عظمیٰ بخاری کا کہنا تھا لاہور آئیں میں آپ کو گھماؤں گی، آئیے آپ کو بہاولپور، ملتان، لودھراں، رحیم یار خان، ڈی جی خان دکھاؤں، آپ مجھے کشمور لے چلیے، نواب شاہ، گڑھی خدا بخش لے چلیے کہ آپ نے کیا کیا۔
