وزیراعظم شہباز شریف اور ایرانی صدر مسعود پزشکیان نے امت مسلمہ کے اتحاد پر زور دیا ہے۔ دوحہ میں ہونے والی ملاقات میں نائب وزیراعظم اسحاق ڈار، آرمی چیف فیلڈ مارشل عاصم منیر اور وزیر دفاع خواجہ آصف بھی موجود تھے۔ اس دوران دونوں رہنماؤں نے مسلم ممالک میں یکجہتی کے فروغ پر زور دیا، جبکہ وزیراعظم نے اسرائیلی جارحیت کی سخت مذمت کی اور قطر کے ساتھ مکمل یکجہتی کا اعادہ کیا۔
وزیراعظم نے ایران سے تعلقات کو مزید مستحکم کرنے کی خواہش کا اظہار کرتے ہوئے کہا کہ دوحہ سمٹ نے اسرائیل کو واضح اور متحد پیغام دیا۔
شہباز شریف نے ایران کے سپریم لیڈر آیت اللہ خامنہ ای کے لیے نیک خواہشات کا بھی اظہار کیا۔
اس موقع پر ایرانی صدر مسعود پزشکیان نے پاکستان کے فلسطین پر مؤقف کو سراہا جب کہ پاکستان اور ایران کے درمیان قریبی رابطہ جاری رکھنے پر بھی اتفاق کیا۔
