ایڈیشنل سیشن جج شفقت شہباز راجہ نے سابق صدر پاکستان عارف علوی کے خلاف مقدمہ درج کرنے کی درخواست پر تحریری فیصلہ جاری کیا ہے۔ عدالت نے کہا ہے کہ اگر کوئی غیر قانونی عمل ہوا ہے تو ایف آئی اے قانون کے مطابق کارروائی کرے اور ضابطے کی کارروائی مکمل کرے۔
درخواست گزار شہزادہ عدنان نے اپنے وکیل مدثر چوہدری ایڈووکیٹ کے ذریعے عدالت میں درخواست دائر کی تھی جس میں مؤقف اختیار کیا گیا تھا کہ عارف علوی نے بیرون ملک اپنی تقریر کے دوران توہین آمیز الفاظ استعمال کیے، جس پر ایف آئی اے کو مقدمہ درج کرنے کی درخواست کی گئی تھی، لیکن ایف آئی اے نے اس سلسلے میں کوئی کارروائی نہیں کی۔
درخواست میں عدالت سے استدعا کی گئی تھی کہ عارف علوی کے خلاف مقدمہ درج کرنے کا حکم دیا جائے۔ عدالت نے ایف آئی اے کو معاملے پر قانونی کارروائی مکمل کرنے کی ہدایت کی ہے۔
