بلوچستان کے ضلع خضدار میں مسافر بس پر نامعلوم افراد کی فائرنگ اور بعدازاں آگ لگنے کے باعث اٹھارہ افراد جاں بحق ہوگئے۔
پولیس حکام کے مطابق خضدار میں مرکزی شاہراہ پر ایک مسافر بس منی پیٹرول پمپ کے سامنے کھڑی تھی کہ اس دوران نامعلوم کار سواروں نے خاندانی دشمنی پر ایک شخص کو قتل کرنے کیلئے فائرنگ کردی، فائرنگ سے منی پیٹرول پمپ میں آگ لگ گئی، آگ نے وین اور قریب واقع دوکانوں کو بھی اپنی لپیٹ میں لے لیا، آگ لگنے سے بس میں موجود خاتون اور بچے سمیت اٹھارہ افراد جاں بحق اور متعدد جھلس گئے۔ واقعہ کے بعد پولیس اور ریسکیو کے عملے نے موقع پر پہنچ کر آگ پر قابو پانے کی کوشش کی اِس دوران فائر بریگیڈ کو بھی طلب کر لیا گیا، جس نے آدھے گھنٹے کی جدوجہد کے بعد خوفناک آگ پر قابو پالیا، آتشزدگی کے باعث مقامی دکانوں کو بھی نقصان پہنچا۔ وزیراعلیٰ نے واقعہ پر رپورٹ طلب کرتے ہوئے انتظامیہ کو زخمیوں کو بہترین علاج کی سہولیات فراہم کرنے کی ہدایت کی ہے۔
