وزیر خزانہ محمد اورنگزیب نے کہا ہے کہ اسٹیٹ بینک نے مہنگائی پر مؤثر قابو پایا ہے اور آنے والے برسوں میں ملکی حالات مزید بہتر ہوں گے۔ کراچی میں جاب فیئر میں شرکت کے بعد میڈیا سے گفتگو کرتے ہوئے وزیر خزانہ نے کہا کہ روزگار میلے کا انعقاد خوش آئند ہے جہاں سرکاری اور نجی ادارے نوجوانوں کو مواقع فراہم کر رہے ہیں۔
انہوں نے کہا کہ ایسے اقدامات سے نوجوانوں کو روزگار تلاش کرنے اور اپنی صلاحیتیں منوانے کا موقع ملتا ہے۔
محمد اورنگزیب کا کہنا تھا کہ معاشی استحکام کے لیے نجی شعبے کو بھرپور کردار ادا کرنا ہوگا، عملی زندگی میں کوئی شارٹ کٹ نہیں ہوتا۔
نوجوان محنت کو اپنا شعار بنائیں اور اپنی صلاحتیوں کو درست انداز میں بروئے کار لائیں۔
وزیر خزانہ نے مزید کہا کہ حکومت کا کام سازگار ماحول فراہم کرنا ہے، پائیدار ترقی کے اہداف کے حصول کے لیے سب کو مل کر کام کرنا ہوگا اور کارپوریٹ سیکٹر کو بھی آگے بڑھنا ہوگا۔
وزیرخزانہ نے مزید کہا کہ مائیکرو استحکام سے گنجائش پیدا ہورہی ہے، اسٹیٹ بینک نے مہنگائی کو بہترین طریقے سے قابو کیا۔
آئندہ چند سالوں میں حالات مزید بہتر ہوں گے، تین ایجنسیوں نے پہلی بار مل کر پاکستان پر اعتماد کیا۔
