تنازعہ جموں وکشمیر اور فلسطین کے حل اور اسلام کے تااثرکو بہتر بنانے کیلئے رکن ممالک کے مابین تعاون ناگزیرہے،امریکہ میں بننے والی گستاخانہ فلم کی مذمت کرتے ہیں: او آئی سی
اسلامی تعاون تنظیم کے وزراء خارجہ نے 85 نکات پر مشتمل مشترکہ اعلامیہ کی منظوری دیتے ہوئے تنازعہ جموں وکشمیر اور فلسطین کے حل اور اسلام کے تااثرکو بہتر بنانے کیلئے رکن ممالک کے مابین مکمل حمایت اور تعاون کو فروغ دینے کی ضرورت پر زور دیا ہے ۔
او آئی سی کے رکن ممالک کے وزراء خارجہ کا رابطہ اجلاس چیئرمین اور قزاخستان کے وزیر خارجہ یرزان کا زیخونوف کی صدارت میں اقوام متحدہ کے ہیڈکوارٹر میں منعقدہوا جس میں جموں وکشمیر کے عوام کی اقوام متحدہ کی قراردادوں اور کشمیری عوام کی امنگوں کے مطابق حق خود ارادیت کے قانونی حق کی حمایت کی گئی۔ اجلاس میں کشمیری عوام کے انسانی حقوق کے مکمل احترام اور ان کو سہولیات کی فراہمی کیلئے تمام مطلوبہ اقدامات کی ضرورت پر زور دیا گیا۔ اجلاس میں مطالبہ کیا گیا کہ بھارت عالمی انسانی حقوق کے گروپوں اور انسانی تنظیموں کو جموں وکشمیر کا دورہ کرنے کی اجازت دے۔ اجلاس میں مقبوضہ کشمیر میں انسانی حقوق کی سنگین خلاف ورزیوں اور طاقت کے وحشیانہ استعمال اور او آئی سی کے حقائق تلاش کرنے والے مشن کو دورہ کی اجازت نہ دینے پر سخت افسوس اور تشویش کا اظہار کیا گیا۔ اجلاس میں بھارت سے مقبوضہ کشمیر میں 2156 گمنام اجتماعی قبروں کی دریافت کی آزادانہ تحقیقات اور ان جرائم میں ملوث افرادکو سزائیں دینے کا بھی مطالبہ کیا گیا۔ اجلاس میں پاکستان کی جانب سے مقبوضہ کشمیر سمیت تمام اہم مسائل کیلئے مذاکرات کی کوششوں کی تعریف اور عالمی برادری سے پاک بھارت تنازعات کے حل کیلئے کردار ادا کرنے پر زور دیا گیا۔اعلامیہ میں امریکہ میں ایک غیر ذمہ دارگروپ کی جانب سے گستاخانہ فلم بنانے کی بھی شدید مذمت کرتے ہوئے اوآئی سی ک تمام رکن ممالک اور عالمی برادری سے مذاہب اور ان کی مقدس ہستیوں کی توہین پر مبنی میڈیا مواد کی تیاری اور تشہیر کے سد باب کیلئے اقدامات اٹھانے کا بھی مطالبہ کیا گیا
