حماس کے اسرائیل پر بڑے حملے کے بعد اسرائیل کی غزہ پر جوابی بمباری کے نتیجے میں کم از کم 200 فلسطینی شہید اور 1600 سے زائد زخمی ہوگئے۔
عرب میڈیا کے مطابق حماس کے اسرائیل پر حملے بعد اسرائیل نے غزہ پر بمباری شروع کردی، بمباری کا سلسلہ وقفے وقفے سے تاحال جاری ہے، ہر تھوڑی دیر بعد غزہ کے کسی حصے پر اسرائیلی ہوائی جہاز میزائل حملے کررہے ہیں اور ہر کچھ دیر بعد غزہ کے کسی کسی حصے سے دھواں اٹھتا ہوا دکھائی دے رہا ہے۔
اسرائیلی فوج کا کہنا ہے کہ اس نے راکٹ حملوں کے جواب میں غزہ میں حماس کے اہداف پر جوابی فضائی حملے کیے ہیں۔
عرب میڈیا کے مطابق اسرائیلی فوج حماس کے جنجگوؤں کے نام پر غزہ میں جگہ جگہ معصوم جانوں کو نشانہ بنارہی ہے، اب تک اسپتالوں میں دو سو سے زائد فلسطینی باشندوں کی لاشیں لائی جاچکی ہیں جبکہ ایک ہزار سے زائد افراد زخمی ہوچکے ہیں، غزہ میں اس وقت شدید ترین جنگی کیفیت طاری ہے تاہم اس کے باوجود فلسطینی باشندوں کے حوصلے بلند ہیں اور وہ اسرائیل پر ہوئے اس بڑے حملے پر خوش ہیں۔
غزہ کی وزارت صحت نے کم ازکم 200 شہادتوں اور 1600 سے زائد افراد کے زخمی ہونے کی تصدیق کی ہے۔
اسرائیلی میڈیا کے مطابق اسرائیل کی سیکیورٹی کابینہ کا ہنگامی اجلاس طلب کرلیا گیا اور آئی ڈی ایف نے حماس کے ٹھکانوں کو نشانہ بنانا شروع کر دیا ہے۔
یہ بھی پڑھیں: آپریشن طوفان الاقصی: حماس کے اسرائیل پر ہزاروں راکٹ حملے، 100 ہلاک اور سینکڑوں زخمی
واضح رہے کہ رواں سال اسرائیل کے مظالم کے نتیجے میں جنوری سے اب تک تاحال 250 سے زائد مظلوم فلسطینی باشندے شہید ہوئے جبکہ آج کی شہادتیں علیحدہ ہیں۔
